Usa na sad ka makapakurat ug makapahasubo nga rebelasyon sa nagpadayong hearing sa Quad Committee sa Ubos Balay Balauranan ang extrajudicial killings (EJK) sa miaging administrasyon?
Si Royina Marzan Garma, retired police colonel ug opisyal sa kagamhanan, niangkon sa hearing niadtong Martes, Oktubre 22, 2024, nga siya dunay kasayoran sa pagpatay sa pipila ka opisyal ug mga ahente sa Philippine Drug Enforcment Agency (PDEA) nga gituohang dunay kalambigitan sa pagpalusot sa gidiling drugas.
Matod ni Garma, ang responsable sa pagpatay sa duha ka PDEA agents dunay ganti nga salapi isip kabahin sa kampanya sa paglimpiyo sa han-ay sa awtoridad.
Si Garma taudtaod nga nahimong pangulo sa kapulisan sa dakbayan sa Davao ug nabalhin sa dakbayan sa Sugbo niadtong 2018 hangtod sa iyang pagretiro sa 2019.
Isip suod ni kanhi Presidente Rodrigo Duterte, si Garma gitudlo nga general manager sa state-run Philippine Charity Sweepstakes Office (PCSO) gikan sa 2019 ngadto sa 2022.
Laing makasurprisa nga rebelasyon ni Garma mao ang iyang kasayoran bahin sa pag-ambush ni kanhi Daanbantayan mayor Vicente Loot sa 2018.
Gawas pa, daghan pang high value official ang nangamatay, dili lang sa dakbayan sa Sugbo apan lakip sa lalawigan, sama nila ni Earl Rallos ug Von Rian Tecson.
Niangkon usab si Garma sa kantidad sa bayad alang sa pag-neutralize sa mga personalidad nga gituohang dunay kalambigitan sa gidili nga drugas.
Dili maayo ang pagpayuhot og gidiling drugas. Giisip kini nga dangan sa katilingban human daghang ngilngig nga krimen ang nahimo sa mga suspek nga ubos sa espiritu sa gidiling drugas.
Apan ang pagsumpo pinaagi sa pagbutang sa kaugalingong kamot batok sa malapason o paghimo sa laktod nga hustisya dili usab maayo ubos sa landong sa demokrasya.
Hinuon, ang pipila nga dangan sa katilingban angay nga mapuo human naghimong risgo sa pagpuyo nga luwas ug malinawon sa kinabag-an sa populasyon.
Makapasubo nga sitwasyon. Unsa pa kahay ubang rebelasyon ning semanaha?