Editoryal: Makauuwaw nga kabaho sa basura

Editoryal: Makauuwaw nga kabaho sa basura
Editorial Cartoon By Ariel Itumay

Hangtod karon, ang Singapore-like nga mantra sa Kagamhanan sa Dakbayan sa Sugbo ubos sa administrasyon ni Mayor Michael Rama maglanoglanog gihapon kon moestorya na ang mga opisyal ug kawani sa kagamhanan.

Gani, usa sa mga proyekto sa Siyudad mao ang pagpanindot sa mga bati, sama sa mga dapit nga labayanan og basura. Limpyuhan ug hakuton, dayon pulihan og mga tanom. Kini nga lakang nga ubos sa pagpangulo ni Grace Luardo sa Cebu Environmental Sanitation and Enforcement Team (CESET) dalaygon kaayo. Maanindot nga ideya.

Apan dunay laing problema sa garbage ang Siyudad. Kini mao ang kabaho sa mga garbage truck nga manghakot sa mga basura gikan sa nagkadaiyang mga barangay sa siyudad padulong sa labayanan sa Brgy. Binaliw.

Baho kaayo ang mga trak samtang magpadulong sa labayanan. Mosamot kini sa pagpangalisbo kon mobalik na ang mga sakyanan nga way nay sulod nga mga basura.

Di lang kay baho, daghan sa mga karga ini mangatagak gikan sa trak. Ngil-ad ug hugaw kaayo nga talan-awon ang makita matag ba­sura nga mangatagak sa karsada. Tinuod nalimpyo ang mga labayanan, apan naa man say nagkatag nga mga basura sa karsada. Ang uban ingon sa dunay nauban nga hugaw sa tawo.

Sa mga turista nga makasugat niini, makauulaw kaayo alang sa Siyudad, ning administrasyon karon nga nagtinguha og Singapore-like o Melbourne feels. Sa kabaho sa mga trak sa basura ug agianan niini, di ka makaingon nga naa ka sa Singapore o imong na-feel nga sama ka og naa sa Melbourne. Lahi ug layo ra kaayo bisan asa sa duha ka mga dapit.

Apan kini nga problema matubag ug masulbad kini sa Siyudad pinaagi sa pag-invest og dugang sa mga trak ug mga galamiton. Pagtukod og mga pasilidad isip suporta sa garbage collection, sama sa hugasanan sa sa mga trak human og labay ug seguraduhon nga way mangatagak nga basura sa kadalanan sa siyudad.

Gikinahanglan ang dugang aksyon ug investment kon seryusuhon ang Singapore-like sa Siyudad.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph