Gisugdan na ang pasiunang proseso sa pagtaral sa hukmanan kang kanhi Presidente Rodrigo Duterte sa The Hague, Netherlands niadtong Biyernes sa gabii (oras sa Pilipinas). Daghan ang gaatang sa live broadcast sa proceeding nga nakita sa social media.
Gitataw sa kampo sa kanhi presidente nga “kidnapping” ang nahitabo tungod kay wa gipaagi sa hustong proseso ang pagdakop kang Duterte, apan matod sa huwes nga mahisgutan kini sa depensa unya sa pagsugod na sa husay. Apan sa Septiyembre pa kini mahitabo.
Maghuwat pa og pipila ka mga buwan una pa masugdan. Taas nga panahon ang paabuton sa pamilyang Duterte ug sa ilang diehard nga mga supporter. Gikan karon hangtod sa Septiyembre, daghan pa ang mahitabo.
Nagpahigayon na og noise barrage ang ilang supporters sa kabisay-an ug Mindanao. Sugod pa lang ni, matod sa organizers. Makadayeg ka sa ilang ka diehard kay klaro kaayo nga wa giorganisar ug way bisan usa ka sentimo nga gigasto, napahigayon ang mga kalihukan.
Daghan ang nangabalaka nga dunay dautang mahitabo sa ilang "Tatay Digong" kay 79 anyos na ra ba niya duna nay gipamati sa lawas. Apan matod sa huwes nga nisulti ang ilang doktor nga si kanhi Presidente Duterte "fully mentally aware and fit" kun naa sa maayong panghunahuna ug panglawas.
Lahi kaayo ang atong bilanggoan dinhi sa standard sa prisohan sa Europe. Na-confine man tuod sa selda ang kanhi presidente, apan makalaum ang iyang supporters nga hatagan siya sa maayong pagtagad bisan unsa man kabug-at ang mga kaso nga iyang giatubang.
Di sab kini naandan nga bilanggoan sa Europe tungod kay iya kini sa International Criminal Court (ICC). Gitagana kini sagad sa mga head of state o dagkong mga opisyal sa mga nasod nga nakahimo og mga krimen batok sa iyang katawhan.
Kon unsa ka taas ang standard sa mga bilanggoan sa Europe, mas taas pa ang ICC ug sigurado nga kompleto kini sa mga pasilidad.
Nabahin ug nabuak na ang nasod ning nakalabay nga katuigan. Karon misamot na kini sa pagkabahinbahin ug pagkabuak sa alyansa sa mga Marcos ug mga Duterte. Ning mosunod nga mga adlaw hayan modako pa og maayo ang mga panagtapok dinhi sa nasod ug abroad.
Duol na man gyud ang eleksyon sa Mayo, mas mahinungdanon nga ipakita sa mga supporter ni Duterte ang ilang pwersa. Magpanon sa polling precincts aron adto ipakita ang ilang gidaghanon.
Maayo kini nga alternatibo kay dinhi masukod ang politikanhong impluwensya kay ang numero di man mamakak. Mas maayo kini kay sa mga panagtapok nga mahimo lang ibaliwala.
Nakaanindot usab sa piniliay karong Mayo, mapakita sa diehard Duterte supporters ang ilang kusog kay mahimo kining basehanan sa 2028 presidential elections. Kon modaug ang mga kandidato ni Duterte sa eleksyon, diha makita nga lig-on pa diay sila sa natad sa politika sa nasod.
Nga ang kadaugan ni Bise Presidente Sara di kadto tungod kang Presidente Ferdinand Marcos Jr., kundi, tungod sa iyang pagka-Duterte.