Ang pulong welga komon nga hubaron nga usa ka pisikal ug militante nga lihok hinungdan nga negatibo ang reaksiyon sa uban nga dili sakop sa grupo.
Kon buot sabton, ang pagwelga usa sa mga matang sa pagpadayag sa baruganan sa indibiduwal o grupo sa mga isyo ug kini nakalatid sa atong Batakang Balaod.
Apan naobserbahan nga kini nga katungod giabusohan usab sa uban, labina niadto, hinungdan nga nahimo’ng mainiton ug bayolente.
Hinuon, ning ulahing katuigan, ang mga paglusad og mga kalihukan sa parliyamento sa kadalanan mas hapsay ug malinawon na kasagaran.
Naghisgot kita niini tungod sa gikatakda nga usa ka adlaw nga welga o transport strike sa Pagkakaisa ng mga Samahan ng Tsuper at Operators Nationwide (Piston) Cebu chapter karon, Miyerkules, Nobiyembre 22, 2023.
Nahisubay kini sa panawagan sa nasudnong kahugpongan sa Piston sa paglusad og tulo ka adlaw nga nationwide strike sugod niadtong Lunes, Nobiyembre 20, 2023.
Apan si Greg Perez, presidente sa Cebu chapter, niingon nga usa lang ka adlaw ang ilang welga sa Sugbo tungod sa pagtahod sa kapistahan sa Birhen sa Regla sa dakbayan sa Lapu-Lapu niadtong Martes, Nobiyembre 21, 2023.
Ang nag-unang isyo sa ilang protesta mao ang kabahin sa nagkaduol nga deadline alang sa consolidation sa traditional public utility jeepneys karong Disyembre 31, 2023.
Gipasabot ni Perez nga dili sila supak sa modernisasyon sa transportasyon sa nasod, apan wala sila mauyon sa pamaagi sa pagpugos sa pagpamiyembro sa kooperatiba ug paglubong kanila sa dakong utang.
Si Perez nipasalig nga ipatigbabaw ang kalinaw samtang nanawagan sa ubang drayber sa pag-apil sa ilang kawsa. Mapalisar kaha ang transportasyon sa Metro Cebu karon? Si Perez niingon nga magdepende kini sa suporta sa sektor.
