Editoryal: Maminaw sab unta si Rama

Editoryal: Maminaw sab unta si Rama
Editorial Cartoon by Ariel Itumay

Kinsay husto, ang mayor sa siyudad sa Sugbo o ang mga opisyal sa Lalawigan sa Sugbo nga gipangulohan ni Gobernador Gwendolyn Garcia kalabot sa pagpahigayon sa kulturanhong aspeto sa Sinulog 2024?

Si Mayor Michael Rama nga toa sa Austra­lia nagbakasyon niingon nga sa South Road Properties (SRP) ipahigayon ang Sinulog 2024. Bisan wa siya nisulti, apan klaro nga ang iyang pamahayag nga kon motabang di angay butangan og kondisyo mao si Garcia.

Nitanyag man gud si Garcia nga ang Kapitolyo andam mohatag og P20 milyunes nga abag kon ang venue ibalik sa Cebu City Sports Center (CCSC). Apan matod ni Rama nga lisod tungod kay giayo pa ang CCSC alang sa Palarong Pambansa ug nagpadayon ang trabaho sa Cebu Bus Rapid Transit (CBRT).

Ang kabati sa rota sa Cebu South Coastal Road (CSCR) diin motadlas ang grand parade gireklamo. Way kapasilungan ang mga partisipante ug init usab sa mga nanan-aw.

Balido kaayo ni nga obserbasyon kay gani, mismo ang Sinulog officials, nagplano nga mga alas 3 na sa hapon sugdan ang grand parade aron di mainitan ang mga partisipante ug mga manan-aw. Kon nakahuna-huna sila niini, sa ato pa, sila mismo niangkon nga balido ang reklamo.

Lahi sa kinapusoran sa siyudad nga dunay tag-as nga buildings nga makatago sa direktang kainit ang mga partisipante ug mga nanan-aw.

Gawas pa, duol na lang sa usa ka buwan, ang venue wa pa maandam, sama sa nahitabo sa miaging tuig. Gibisita gani kini mismo ni Acting Mayor Raymond Alvin Garcia, kinsa mas pabor nga sa CCSC ipahigayon ang Sinulog, apan nitataw nga ang katapusang hukom iya ni Rama.

Mas maayo usab nga paminawon ni Rama ang iyang kaubang officials sa lalawigan, di lang kay iyang iinsister nga ang iyang gusto maoy matuman kay siya ang mayor. Way magbuot.

Kon kahiusahan ang iyang tumong, maminaw usab siya sa sentimyento sa ubang officials nga giuyonan sab ubang official sa Cebu City apan naikog lang mosulti sa mayor.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph