Editoryal: Maora og gisabong

EDITORYAL
EDITORYAL

Daghan og negatibo nga mga reaksyon ang pagbalibad ni Gobernador Gwendolyn Garcia sa imbetasyon sa Siyudad sa Sugbo sa pagpasayaw sa mga contingent nga modaug sa Sinulog sa Kabataan sa Lalawigan 2024 sa parade ug showdown sa Enero 21.

Nipasabot ang gobernador nga ang desisyon iya sa mga mayor ug choreographers ug di niya mabutang sa risgo ang mga bata nga mangapil tungod sa sitwasyon sa South Road Properties.

Ang iyang pagbalibad gisaway kay ingon sa nisupak siya kang Mayor Michael Rama kay ang iyang gusto sa Cebu City Sports Center.

Apan nipahibawo na man ang gobernador nga moapil sila sa Sinulog sa Kabataan sa Lalawigan nga anha sa CCSC. Motabang pa gani ang Kapitolyo sa pag-andam sa grandstand pinaagi sa paggasto sa pipila ka repairs niini kay dunay pipila nga daut nga nakit-an. Mokabat na sab sa 18 ka local government units (LGU) ang nipadayag sa ilang pagsalmot ug dunay P40 milyunes nga gahin ang Kapitolyo.

Gitataw sab sa gobernador nga wa sila magkasungi ug mag-away sa mayor.

Ang gibuhat sa gobernador nga pag-apil sa Sinulog sa Kabataan, pagpahibawo niya sa paggasto sa Kapitolyo sa milyunes ka pesos sa premyo ug pagtambong sa mga opisyal sa Siyudad, pinangulohan ni Bise Mayor Raymond Alvin Garcia, usa ka timaan nga way kasungian ang Siyudad ug Kapitolyo.

Bisan mismo si Rama niduaw sa CCSC aron matan-aw ang kahimtang. Kini nagpasabot usab nga nagkasinabot na ang Siyudad ug Lalawigan.

Undangon na lang unta ang negatibo nga mga reaksyon ug mga komentaryo nga ingon sa nagpaaway sa duha ka dagkong mga opisyal sa Sugbo kay di kini makaayo sa kapistahan sa Balaang Bata. Undangon na ang mga pangagpas ug tagna-tagna nga nagpatas-anay sa gahom ang duha ka mga opisyal.

Pasagdan na lang ang duha ka mga opisyal kon unsa ang ilang tagsa ka hukom kay di makaayo sa Sugbo ang magsige og hisgot sa managlahi nilang baruganan nga ilang girespetuhan sa usa’g usa.

Bisan ang gobernador niklaro na nga wa silay gikasungian sa mayor ug di usab iyaha ang hukom sa di pagsayaw sa dancers kun di iyaha sa local officials ug choreographers nga nakakita sa giingon nilang malisod nga kondisyon sa SRP.

Focus na lang sa pagpangandam sa kalihukan ug mag-ampo nga maayo ra ang dagan sa kapistahan sa Balaang Bata.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph