Ang Sugbo sentro ug ganghaan usab sa turismo sa Central Visayas busa angay unta nga mga maanindot ang makita sa mga bisita, labina sa imprastraktura.
Apan makauulaw tan-awon ang kahimtang sa daghang mga karsada sa Sugbo, labina kay ngil-ad ang kahimtang niini. Mao gani nga dihay higayon nga mismo si Gobernador Gwendolyn Garcia nasuko kaayo sa Dept. of Public Works and Highways (DPWH) tungod sa bati nga kahimtang sa UN Ave. Sa Dakbayan sa Mandaue. Ang pagtrabaho sa mao nga national highway, nga agianan sa mga turista gikan sa Mactan Cebu International Airport (MCIA), naabtan na og mga tuig nga unta gamay na lang ang tiwasunon.
Di lang kini ang dapit sa Metro Cebu nga dunay problema. Sa Dakbayan sa Sugbo lang daan, daghan kaayo ang mga dapit nga bati og kahimtang ang mga karsada. Wa pa magkadimao ang mga drainage system kay barado, puno sa mga basura. Gawas nga barado, baho pa gyud.
Kon itandi sa ubang mga lalawigan sa Central Visayas, sama sa Bohol ug Negros Oriental, lapad kaayo ug hamis ang ilang mga dalan. Ngano kaha? Di kini angay nga ikahibulong kay isip sentro sa komersyo sa Kabisay-an, mas taas ang gidaghanon sa mga sakyanan nga naggamit niini itandi sa ubang mga dapit.
Bisan pa og ipahigayon ang usa ka pagtuon, sa yano lang nga pagtinamban, taas og volume ang gidaghanon ug tonelada sa mga sakyanan nga mag-agian sa Sugbo itandi sa ubang mga lalawigan.
Busa, mas dali ang wear and tear.
Apan dawaton na ba lang diay kini nga rason? Nganong di man kanunayon ug paspasan ang pagpangayo sa mga karsada sa isla sa Sugbo? Di ba diay pwede nga magahinan og tinuig nga pundo alang sa preventive maintenance?
Di ba diay mahimo nga paspasan ang pagtrabaho? Bitaw, unsaon man sa pagpaspas sa pagtrabaho nga maayo lang og dunay unom ka mga tawo ang nag-ugmad sa proyekto? Sa pagtrabaho sa imprastraktura, importante ang numero. Apan sa proyekto sa gobyerno, kini hapit zero.