Editoryal: Mas dakong hagit

Editoryal: Mas dakong hagit
File photo

Nalantawan nga mosamot pa ang kahuot sa trapiko sa Metro Cebu tungod sa kapistahan ni Sr. Sto. Niño karong Enero 21. Mohugpa ang mga deboto sa Senyor gikan sa nagkalainlaing dapit ug ubang kanasuran.

Dugang pa, dugukon og minilyon ka mga dumuduong ang Sinulog Festival sa samang adlaw.

Good luck na lang alang sa laing hagit sa daan nang problemado nga sitwasyon sa trapiko labina sa dakbayan sa Sugbo nga sentro sa dakong relihiyuso ug kultural nga kalihukan.

Kumusta na ang pagpangandam sa kapistahan? Dili kaayo isyo sa relihiyusong kalihukan sa Basilica Minore del Sto. Niño. Apan ang Sinulog Festival maoy dako’ng hagit sa pagkakaron.

Tulo na lang ka mga semana, ang Sinulog showdown ipahigayon sa ikaduhang higayon sa South Properties (SRP) subay sa gusto ni Mayor Michael Rama.

Apan ning higayuna, wa pa maporma sa hingpit ang imprastraktura sa maong dapit. Posible nga mabalik ang kasinatian sa miaging tuig nga hangtod sa kaadlawon sa adlaw sa festival nagsige pa og trabaho.

Ang resulta, daghang mga reklamo ug nakatagam sa ubang nanan-aw. Bisan ang mga contingent sa lalawigan sa Sugbo wa moapil tungod sa kakuwang sa pasilidad sa venue.

Ning higayuna, si Cebu Gov. Gwendolyn Garcia nipahayag nga dili moapil kon SRP ang venue tungod sa way igong kapasilungan kon mag-uwan o init labina nga gideklarar na sa Pagasa weather bureau ang ‘strong’ El Niño.

Hinuon, ning panahuna, medyo dunay isyo kon ibalik ang Sinulog sa Cebu City Sports Center (CCSC) nga ubos pa sa pag-ayo ug ang Cebu Bus Rapid Transit (CBRT) project sa dalan duol sa CCSC, ang Osmeña blvd. ug N. Bacalso ave.

Komplikado ang sitwasyon. Gikan sa kahimtang sa trapiko ngadto sa pagpahigayon sa dakong kalihukan sa dakbayan ning buwana.

Mao ni gina-ingon nga isalig na lang nato sa Balaang Bata nga magiyahan ang mga lider alang sa maayong desisyon sa mas dakong hagit sa unahan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph