Editoryal: Mas dali ang paglakaw kay sa magsakay

Mas dali ang paglakaw kay sa magsakay
Mas dali ang paglakaw kay sa magsakay

Maghilak ang adlaw kon way post kalabot sa kahuot sa trapiko sa dakbayan sa Sugbo ug ubang bahin sa Metro Cebu, labina sa rush hours o kon di man gani, kanang mao pay pagkahuman sa ulan.

Natural na kaayo ni nga problema bisan asa nga highly urbanized nga mga lugar sa kalibutan nga di kaayo maayo og imprastraktura sa public transport. Bisan gani sa adunahan nga mga nasod.

Di ang pampublikong mga sakyanan ang nakahuot sa kadalanan, kon di pribadong mga sakyanan nga nagkadaghan kada tuig. Mao usab ni ang sagad mangreklamo sa kahimtang sa trapiko.

Sa adunahan nga mga pamilya, labing minos duha ka buok ang mga sakyanan ang gipanag-iya, labina kon nagpuyo sa hilit nga mga subdivision. Naay uban magtagsa.

Imagine kon mao ni ang kahimtang, unsa ka dako sa space sa karsada ang ilang makaon? Unya ang sakay ani usa o duha ra ka buok. Sa 10 ka pribadong sakyanan, lagmit 10 ra sab ka tawo ang nakapahimulos. Kausik sa dako nga space sa karsada nga nakaon.

Itandi sa public transport, gawas lang sa taxi, nga makapasakay og sobra sa 10 ka mga tawo sa usa ka gamay nga space, busa klaro nga mas efficient. Daghan ang nakapahimulos.

Busa, kon magpadayon sa pagpanaghan ang mga sakyanan sa kadalanan, hayan moabot ang panahon nga rush hours, mas dako pang kahigayunan nga mas dali ang pag-abot nga maglakaw kay sa magsakay.

Di sab kapugngan ang tawo nga mopalit og sakyanan kon duna nay kapabilidad sa pagpalit tungod kay iya kining katungod.

Niini, hinaot pa nga ang dugay nang gipaabot nga Cebu Bus Rapid Transit (CBRT) modani sa mga nanag-iya og sakyanan sa pagdangop ani nga matang sa transportasyon. Nga kini mas maayo ug mas paspas sa pag-uli kay sa magdala og kaugalingon nga sakyanan.

Apan magkayamukat lang gihapon ang karsada kon padayon nga managhan ang pribado’ng mga sakyanan sa kadalanan bisan kon naa na ang CBRT. Ayaw basula ang gobyerno nianang higayuna.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph