Pipila ka mga tuig ang nakalabay, gipawong ang mga cell site aron way cellular phone signal panahon sa dagkong mga kalihukan sa Sinulog. Daghan ang naproblema kay kalit kaayo ni nga kausaban sa naandan nang kinabuhi sa katawhan nga maka-communicate sa labing sayon nga paagi.
Kada tuig mohangyo ang kapulisan alang niini alang sa seguridad kay daghan sa mga pagpamomba sa Mindanao naggamit og cellular phone isip trigger kun maoy nagpaulbo sa bomba. Labing uwahi niini mao ang pagpamomba niadtong Disyembre sa unibersidad sa Marawi City.
Ang proposal sa kapulisan sa dakbayan sa Sugbo alang sa samang lakang sa Sinulog 2024 gisalikway kay alang kang Cebu City Mayor Michael Rama “jurassic” kini nga lakang. Kinaraan na. Nitataw ang mayor nga salig kaayo siya sa pagpangandam sa kapulisan busa wa na kinahanglana ang pagpawong sa cellular sites.
Sakto kaayo ang mayor tungod kay sa kadaghan sa mga tawo karon, ang kahigayunan nga magkabuwagbuwag ang mga grupo dako og kahigayunan. Gamit usab kaayo ni sa mga emerhensya diin ang komunikasyon importante kaayo.
Maka promote sab ni sa mga talan-awon sa Sinulog kay dali ra kaayo nga maka upload sa social media ang katawhan.
Daghan ang kaayuhan nga dala sa di pagpawong sa cellular sites kay sa gikabalak-ang hulga sa pagpamomba. Kay kon dunay teroristang determinado sa paghimo niini, kaya kaayo ang pagbuhat og dautan.
Apan sa kadaghan sa security personnel nga mokabat sa 3,000 kapin, wa pay labot ang force multipliers, partisipasyon pa sa komunidad, magpanagana ang si bisan kinsa nga mohimo og kagubot.
Gawas pa, ingon sa tinapulan ang pagpawong sa signal. Mahimo na hinuon nga kampanti o lugak sa seguridad ang mga awtoridad ug uban pang nagbantay sa seguridad.
Daghan na sab nga nangagi nga mga Sinulog nga way pagnganay sa signal sa cellphone, malampuson ug nahuman nga malinawon, gawas lang sa ginagmay nga mga kagubot dala sa nangahubog na.