Unang gitangtang sa Ombudsman sa katungdanan si suspended Mayor Michael Rama. Una siyang gisuspenso og unom ka buwan tungod sa reklamo sa tulo ka mga kawani nga wa maswelduhi og daghang mga buwan.
Di lang si Rama ang gisuspenso nga chief executive sa Sugbo. Gipahamtangan usab og usa ka tuig nga pagsuspenso sa katungdanan si Mandaue City Mayor Jonas Cortes. Kini tungod sa pagtudlo og social welfare officer nga wa masubay sa lagda sa kagamhanan sa pagtudlo og opisyal ning mao nga buhatan.
Human gisuspenso si Rama, gisundan dayon kini sa kamanduan sa Ombudsman sa pagtangtang nga hingpit kaniya sa katungdanan ug pagdili na kaniya nga makahupot og katungdanan sa kagamhanan kun perpetual disqualification.
Nakaplagan siya sa Ombudsman nga sad-an sa kasong nepotism tungod sa pagpasulod og trabaho sa city hall sa iyang duha ka mga bayaw, mga manghod ug igsuong lalaki sa iyang asawa. Human kang Rama, si Cortes na sab ang gitangtang gikan sa katungdanan tungod sa pagtugot nga makapadayon pag-operate ang usa ka planta sa semento bisan sa kakuwang niini sa permit.
Sama kang Rama, gipahamtangan sab siya og perpetual disqualification sa paghupot og katungdanan sa kagamhanan. Bisan pa niini, sila si Rama ug Cortes nang-file sa ilang certificates of candidacy (COCs) alang sa 2025 elections kay di pa man ni final ang kamanduan sa Ombudsman kay duna pay sundon nga legal nga proseso nga mao ang pagdangop sa korte.
Ang duha ka local chief executives ningpahibawo na nga mogamit sila sa mga legal nga lakang. Sa ato pa, taas pa ang panahon nga hayan ang tanan moabot pa sa Korte Suprema. Hayan gani, human sa unom ka buwan nga suspensyon, mobalik si Rama sa katungdanan gamit ang legal nga proseso.
Di kaha kini makaapekto sa ilang kandidatura sa umaabot nga eleksyon kining managlahi nga kamanduan sa Ombudsman? Nasayod na ang publiko nga sa kandidatura importante kaayo ang makinarya.
Kini maglangkub sa mga lider sa matag kandidato gikan sa ibabaw ngadto na sa kinagamyang sitio. Di usab modagan ang makinarya kon way kwarta. Kinsa kaha nga kingmaker ang ganahan moabuno og kwarta sa kanditura nga dunay mantsa nga legal? Kon kuwang og kwarta, di epektibo ug hapsay ang pagdagan sa makinarya.
Posible usab gani nga moislag o mopalayo ang iyang mga ginsakpan nga oportunista, di loyalista. Dinhi na masukod nila ni Rama ug Cortes kinsa ang tinud-anay nga dunay pagbati ug way paglubad ang suporta kanila.