Dili tiaw nga mawad-an og mga minahal sa kinabuhi ning panahon sa Pasko. Inay magmalipayon, nagmasulub-on ang pamilya.
Kini ang gibati karon sa mga tagtungod sa upat ka mga kinabuhi nga nakalas sa pagbuto sa usa ka matang sa pyrotechnics ug gituohang maoy hinungdan sa pag-ulbo sa sunog sa pabrika sa Purok Judas Belt, Brgy. Babag 2, dakbayan sa Lapu-Lapu ala 1:40 sa hapon sa Lunes, Disyembre 11, 2023.
Laing unom ang nangaangol o napaso sa maong hitabo sa himuanan og mga pabuto nga gipanag-iya ni Chito Berdin, kinsa lakip sa namatay. Dili dako ang danyos sa kabtangan nga naabo sa sunog apan walay katugbang nga bili sa kinabuhi sa upat ka mga tawo nga nanginabuhi sa paghimo og mga pabuto.
Dili usab kini unang higayon nga hitabo sa Lapu-Lapu nga dunay pipila ka mga barangay nga naila sa paginabuhian sa paghimo og mga pabuto. Wala usab nagkuwang ang lokal nga kagamhanan ug awtoridad sa pagpahimangno kabahin sa kaluwasan ug pag-awhag nga himuong legal ang ilang operasyon.
Atol sa adlaw sa trahedya sa pabrika sa pabuto niadtong Lunes, ang Police Regional Office (PRO 7) niluwat og kamandoan sa Lapu-Lapu City Police Office (LCPO) sa pagsusi sa mga himoanan og pabuto ubos sa ilang hurisdiksyon. Apan sama sa nauwahi o nadunggan kini sa panghitabo. Dunay nibuto ug niulbo sa wa pa ang sunog sa naasoy nga pabrika.
Maayong makanunayon ang pagsusi sa mga awtoridad sa mga pabrika sa pabuto ug subsob na sulod sa pipila ka buwan sa dili pa ang Pasko, diin ang pagpangpahimo og pabuto mokusog alang sa kasaulogan ngadto na sa pagsugat sa Bag-ong, kapistahan sa Senyor Sto. Niño ug ang Sinulog Festival.
Labaw sa tanan, ang mga tag-iya og pabrika o himoanan sa pabuto maoy mas responsable sa ilang kaluwasan, sila mismo ang direktang maapektuhan kon dunay bulilyaso sa operasyon tungod sa karisgo sa maong negosyo. Hinaot nga ang nahitabo sa Babag 2 mahimo’ng leksiyon ug dili na kini mausab nga trahedya nga naghimong masulob-ob sa Pasko sa pipila nato ka mga igsuon.