Atol sa gipahigayong cleanup activity sa Sitio Naba, Barangay Mambaling, Dakbayan sa Sugbo sa Huwebes, Marso 20, 2025, ubay-ubay nga basura ang nakolekta sa mga partisipante gikan sa nagkalainlaing departamento sa Cebu City Hall sama sa Department of Public Services, Cebu Environmental Sanitation and Enforcement Team ug grupo sa mga Badjao.
Kining maong mga basura natabunan kaniadto sa mga kabalayan sa Badjao community apan naklaro na ni karon human nasunog ang gibanabanang moabot sa usa ka gatos ka balay niadtong Marso 2, 2025, atol sa ikaduhang adlaw sa pagsulog sa Fire Prevention Month.
Human sa sunog, ang mga basura nagpabilin sa lugar kay wala hiposa sa mga naglabay niini.
Imbes ang mga tag-iya sa balay nga nasunog ang mohipos niini, ang kagamhanan sa dakbayan na hinuon ang nibuhat sa maong tahas sa Huwebes aron mahapsay ang lugar.
Adunay rason ngano’ng dili na papuy-on og balik ang mga nasunogan, sagad kanila mga Badjao, aron dili na kini labayan og mga basura nga ang uban niini nanglutaw na sa dagat nga makita sa mga motorista ug mga tawo nga molabay padulong sa South Road Properties (SRP).
Hinuon, makapuyo gihapon ang mga apektado sa sunog sa siyudad apan adto sila ibutang sa Barangay Inayawan duol gihapon sa baybayon.
Dili ba kaha adto na pud didto manglutaw ang basura?
Matod ni Konsehal Jerry Guardo nga mao ni ang relocation site nga gisugyot sa City Planning alang sa mga nasunogan kay sa ingon ani nga lugar sila naanad og puyo.
Samtang ang luna nga nabakante sa sunog mas maayo tingali nga himuan og usa ka socialized housing condominium sama sa nahitabo didto sa Barangay Lorega diin ang mga residente nga na-displace sa demolisyon, sunog, gubat sa baha nga programa sa dakbayan, ug natural nga kalamidad maoy gihatagan og prayoridad nga makapuyo.
Pabayron ang mga okupante og binuwan nga abang o rent-to-own nga pamaagi sa ilang giukopahan nga yunit. Niining paagiha, limpyo tan-awon ang siyudad.
Ang mga tawo usab nga namuyo malimpyado kay maikog na man silang maghugaw-hugaw kon ang ilang palibot limpyo.
Ang tawo mamahimong hugawan o limpyado magdepende sa iyang environment.