Niadtong Enero 12, 2024, nitahan sa kapulisan ang nikumpisal nga killer ni Joel Jude Unchuan. Siya giingon nga niangkon nga maoy nipatay sa Sinulog Idol vocal coach.
Apan ang kapulisan nagduha-duha sa pagtuo kang Sanny Lumangca, 21, nga sa kinatibuk-an sa paghimo sa krimen, nagbinugtong siya. Ang nakapaturok sa pagduda sa kapulisan mao ang iyang pag-angkon nga di siya kahibawo mo-drive.
Di siya kahibawo mo-drive, apan niabot og dakbayan sa Naga ang self-confessed killer. Sa iyang extra-judicial confession base sa pamahayag sa kapulisan, sa Subangdaku, Mandaue City niya napatay ang Sinulog Idol personality. Sa Sitio Palanas, Barangay Inayagan, Naga City, niya gilabay ang lawas, nga dunay gilay-on nga di mominos sa 30 kilometro. Unya di kahibawo mo-drive?
Di pa ni mao. Ang sakyanan ni Coach J, nga mas naila si Unchuan, gibilin sa lungsod sa Liloan niadtong Enero 1, 2024 sayo sa buntag. Di kahibawo mo-drive?
Di pa ni mao. Ang mga saksi nga nakakita sa pagbilin sa sakyanan nitumbok og duha ka mga tawo nga gihulagway nga mugbo, apan dakuon og mga lawas. Kinsa diay tong ikaduha nga nakit-an, multo? Iyang nadaug ang lawas ni Coach sa paglabay nga nag-inusara?
Busa, ang Police Regional Office (PRO 7) nagdumili pa sa pagdawat sa pamahayag ni Lumangca nga siya nag-inusara sa paghimo sa krimen.
Tingali, sa pagpatay siya nag-inusara. Apan kay di man siya kahibawo mo-drive, hayan nangayo siya og pakitabang sa usa ka tawo nga iyang masaligan. Kinsa kining tawhana, kini ang gisusi karon sa kapulisan.
Kay kinsa bay motuo nga siya nag-inusara unya sa samang higayon siya niangkon nga di kahibawo mo-drive? Kalit lang siyang nakat-on og drive?
Kon ang ikaduha nga tawo naa man gani, igo siyang nitabang sa paglabay sa lawas ug sakyanan, mas maayo pang mogawas aron makaangkon pa siya og kahigayunan nga kon makiha man, medyo gaan ang iyang kaso.