Editoryal: Mga kamot ni Sto. Niño

File Photo
File Photoeditoryal-default

Ikaduha na unta nga wa nagkasinabot ang Cebu City ug Kapitolyo kalabot sa pahigayunan sa dagkung mga kalihukan sa kulturanhong aspeto sa Sinulog.

Maayo gani kay dunay hayan mga back channel nga sabotsabot hinungdan nga nalikayan ang pagdaku pa unta niini og maayo, sama sa nahitabo sa miaging tuig.

Ang wa makita tingali mao ang mga kamot ug paglamdag sa Balaang Bata nga gisimba sa mayoriya sa mga Sugboanon. Nakab-ot ang win-win solution.

Sa Cebu City Sports Center (CCSC) gipahigayon ang Sinulog sa Dakbayan kagahapon samtang karon ang Sinulog sa Lalawigan. Niabag pa gani ang Provincial Government og minilyon nga pundo aron kini magmalampuson.

Daghan ang gikuyawan nga basin masubli ang nahitabo sa miaging tuig nga sa Carmen ipahigayon ang Sinulog sa Lalawigan. Wa ni mahitabo karon.

Bisan wa moklaro, si Mayor Michael Rama misusi sa kahimtang sa CCSC ug nimando pa gani nga hawanan ang Osmeña Blvd. sa mga separator sa Cebu Bus Rapid Transit (CBRT) nga hayan makabalda sa mga dancer.

Di unta usab mahitabo ang patas-anay og ihi kon sa sayo pa lang, sa Septiyembre ba, giesturyahan na kini sa duha ka mga local government unit (LGU). Unya sa labing dugay Nobiyembre gisugdan na pagtrabaho ang venue sa South Road Properties (SRP) nga unta naghisgot na man ang mayor nga adto lang gihapon ang grand parade ug ritual showdown.

Kana ganing anha na diha magkara-kara kon duol na unya lalisan pag asa diay ipahigayon. Ang duha ka dagko’ng mga opisyal dunay mga katarungan nga kon tan-awon dunay basehanan.

Katungod ni Gobernador Gwendolyn Garcia nga tan-awon kon unsay maayo alang sa mga contingent sa lalawigan ug unsay gusto sa mga mayor ug sa ilang mga ginsakpan.

Si Rama sakto sab, isip mayor siya ang magbuot. Naa may gitrabaho nga mga pasilidad alang sa Sinulog sa SRP. Ang dapit mao usab ang umaabot nga ekonomikanhong dapit sa siyudad sa Sugbo busa karon pa lang, mas maayo nang mag-anad ang mga Sugboanon.

Maayo na lang kay sa kalit lang, duna nay mga kalambuan nga positibo hinungdan nga wa nay naglalis. Bisan si Gob. Garcia niklaro nga wa sila nag-away sa mayor.

Dinhi niduwa ang mga kamot sa Balaang Bata, nga wa tuod makita apan ang mga dagan sa mga hitabo mao ang mga timailhan sa Iyang pagpatunga ning tanan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph