Subay ning nanggawas nga mga taho mahitungod sa pagkuyanap sa sakit nga Monkeypox (Mpox), daghan na nga mga local government unit nga nagpagawas og pasidaan sa mga residente nga mag-amping aron dili matakdan sa maong sakit.
Si Dr. Debra Catulong, ang pangulo sa Mandaue City Health Office, niawhag sa mga tawo nga magsul-ob og face mask, kanunay nga maghugas sa kamot, ug maglikay sa mga lugar nga daghang tawo.
Ang Dakbayan sa Mandaue adunay usa ka gisuspetsahan nga kaso sa Mpox – usa ka 39-anyos nga lalaki nga gikuhaan og sample sa specimen aron ipadala sa Research Institute for Tropical Medicine (RITM) alang sa confirmatory testing.
Ang maong pasyente nagpakonsulta niadtong Huwebes, Mayo 29, 2025, human nakamatikod og mga samad sa panit.
Gipaubos na siya karon sa home isolation aron dili makatakod og laing tawo.
Gitambagan ni Catulong kadtong mga residente nga nakasinati og kadudahan nga mga simtomas sa Mpox nga magpa-checkup o ba kaha dili mogawas sa ilang balay aron malikayan ang posible’ng pagkuyanap sa kagaw nga dala sa sakit.
Ang pag-inom og igong tubig, pagpahulay, ug pag-inom og paracetamol makatabang sab sa paghupay sa mga simtomas.
Sa Siyudad sa Talisay, Sugbo, usa ka lalaki sab nga namatay human nagpositibo sa monkeypox.
Apan giklaro ni Talisay City Mayor Samsam Gullas dili monkeypox maoy hinungdan sa kamatayon sa pasyente, sanglit aduna kini laing gipamati sa lawas nga maoy gitumbok nga “actual cause of death” niini.
Samtang adunay tag-usa ka kaso sa Mpox nga nakumpirmar sa Iloilo City ug sa probinsiya sa Iloilo sa Miyerkules, Mayo 28, 2025.
Hugot sab nga gibantayan sa Iloilo City Health Office (CHO) ang laing upat ka tawo nga gidudahan nga natakdan sa Mpox.
Si Dr. Mary Ann Diaz, pangulo sa Iloilo City Health Office, sa iyang bahin, niawhag sa mga residente nga maglikay sa mga lugar nga daghan og tawo aron mamenusan ang skin-to-skin contact, magpakonsulta kon makasinati og mga simtomas, ug mag self-isolation aron mapugngan ang pagkaylap sa impeksyon.
Didto sa Bangsamoro Autonomous Region in Muslim Mindanao (MOH-Barmm) adunay duha ka kompirmadong kaso sa Mpox.
Ang duha ka pasyente gilangkuban sa usa ka 59-anyos nga taga Sultan Kudarat, Maguindanao del Norte, ug usa ka 28-anyos nga babaye gikan sa Datu Odin Sinsuat, Maguindanao del Norte usab.
Hinuon, anaa sila sa luwas nga kahimtang og pulos gipangbutang sa isolation center aron dili makatakod.