Mga drayber og motorsiklo, mag-amping intawon ta nga mag-drayb.
Dinhi sa Metro Cebu, duha ka tawo ang nakalas nga may kalambigitan sa motorsiklo sulod sa duha ka adlaw.
Ang una nahitabo sa Biyernes sa buntag, Mayo 30, 2025, sa may dalan A.S. Fortuna sa Barangay Banilad, Mandaue City, atbang mismo sa usa ka automobile showroom, nga miresulta sa kamatayon sa usa ka 36 anyos nga security guard.
Pauli na unta ang biktima gikan sa iyang duty mga alas 6:48 sa buntag.
Pagtabok niya sa karsada, kalit siyang nabanggaan sa naghaguros nga Yamaha X-Max (BKAK 2025) nga gimaneho sa usa ka 27 anyos nga lalaki.
Ang ikaduha nahitabo sa alas 3 sa kaadlawon sa Sabado, Mayo 31, 2025, duol sa flyover sa Governor Cuenco Avenue sa siyudad sa Sugbo, diin usa ka 31 anyos nga lalaki ang nakalas human mi-overtake sa laing sakyanan pinaagi sa pag-counterflow hinungdan nga naigo sa kasugat nga pick-up truck.
Maayong pagka-gusbat sa walang bahin sa dulong sa pick-up, ingon man usab ang motor di na mahitsura.
Kon dili kita mag-amping sa pagmaneho, sigurado nga daghan pang mahitabo nga sama niini.
Kasagaran sa mga drayber sa motorsiklo agresibo kaayo’ng mopadagan mura’g way kamatayon.
Ang mga drayber pa sa 4-wheels nga sakyanan maoy mahadlok kanila ug magbantay kay mokalit lang kini’g sulpot sa imong atubangan o sa kilid, maghatag og risgo sa disgrasya.
Ang nakapait pa gyud kon ang imong sakyanan mabag-iran kay lisud na gukoron ang motor kay mosutoy og padagan ang drayber niini og maglusot-lusot sa mga sakyanan o ba kaha mosulod sa eskinita, gawas lang niadtong mga drayber nga tarong nga dili motalikod sa ilang tulubagon.
Diha sa Mambaling flyover, gumikan kay hinay ang dagan sa mga sakyanan kay tungason man kini, daghan kaayo’ng mga drayber sa motor nga di makahuwat og gusto nga mo-overtake dayon sa right side, bisan pa og mga dagku’ng sakyanan basta masulod lang ang motor.
Ang delikado ani kon ma-out balance ang driver og matumba unya malatayan sa ligid sa truck.
Una kita molakaw, kinahanglan nga mag-ampo sa Ginoo alang sa maayong pagbiyahe.
Atong basahon ang Biblical verse nga Salmo 91.
Dili ta magsalig sa atong kaugalingon, kay bisan unsa natu ka maayo o kadugay nga mo-drive aduna gyuy panahon nga masipyat ta.
Kuhaan natu’g base kato’ng rider nga nag-banking sa likuon nga bahin sa Transcentral Highway sa Barangay Cansomoroy, Lungsod sa Balamban, niadtong Mayo 10, 2025, nga wa na makabawi og na-crash, hinungdan nga nalamba siya og namatay.
Siyempre, wa gyud to siya maghuna-huna og disgrasya siya kay basin sige na to niyang gibuhat, pero niadtong higayona na-impas gyud siya.