Nahimong peligruso ang sitwasyon alang sa liboan ka mga Pilipino nga nagpuyo ug nagtrabaho sa Iran ug Israel tungod sa nagkagrabeng tensyon tali sa duha ka nasod.
Ang bag-ong pamahayag ni Presidente Ferdinand “Bongbong” Marcos Jr. nga nidesisyon batok sa dinalian nga mandatory repatriation, nagpakita sa usa ka delikado nga pagbalanse nga kinahanglang himuon sa gobiyerno sa Pilipinas: ang pag-prioritize sa kaluwasan sa iyang mga konstituwente o ang pagtahod sa ilang indibiduwal nga desisyon.
Sa Hunyo 18, 2025, nagtuo ang presidente nga dili pa kinahanglan ang mandatory repatriation nga nagtugot sa mga pamilya sa kagawasan sa pagdesisyon kon magpabilin ba sila o mouli.
Ang pasalig sa gobiyerno sa hugot nga pag-monitor ug andam nga tabang importante kaayo, apan dili malikayan nga mangutana bahin sa katulin sa maong tabang kung kalit nga mograbe ang panagbangi.
Ang damage niining panagbangi makita na.
Pito ka Pilipino ang naangol tungod sa pag-atake sa missile, usa niini nga usa ka caregiver grabe ang kahimtang human naigo sa missile ang ilang panimalay.
Dugang pa, 49 ang nawad-an sa ilang mga pinuy-anan.
Kining makahahadlok nga sitwasyon nagpasiugda sa tinuod nga kapeligrohan nga giatubang sa atong mga katagilungsod.
Busa kinahanglan nga mohimo og dinalian nga lakang ang gobiyerno sa pagpapauli sa mga Pinoy didto sa Israel ug Iran ug di na nato hulaton nga aduna pay kinabuhi nga makalas.
Samtang kapin sa 1,300 ka Pilipino ang na-repatriate sukad Oktubre 2023, ang kadaghanan sa kapin sa 30,000 ka Pilipino sa Israel nagpabilin.
Samtang, ang sitwasyon sa 17 ka opisyal sa lokal nga kagamhanan sa Pilipinas ug lima ka turista nga na-stranded sa Israel tungod sa pagsira sa airspace nagdugang og laing komplikasyon.
Ang ilang pagbisita gituyo alang sa pagtuon ug pagbayloay og labing maayo nga pamaagi mahitungod sa dairy farming.
Hinuon, giatiman na sila karon sa gobiyerno sa Israel.
Sa katapusan, ang desisyon sa presidente nga dili ipatuman ang mandatory repatriation niining yugtoa nagpakita og pagsalig sa paghukom sa matag Pilipino ug usa ka pasalig sa paghatag og suporta nga walay pagpugos.
Apan, tungod kay ang sitwasyon nagpabilin nga daling mausab ug dili matag-an, ang kanunay nga pagbantay ug paspas, determinado nga aksiyon mahimong labing importante.