Dalaygon ang presensiya ug suporta sa nasudnong mga opisyal sa mga kalihukan sa Sinulog sa Sugbo. Apan dili ngil-ad nga moagaw sila og eksena sama sa nahimo’ng political rally. Usa kini sa mga talan-awon sa Sinulog sa Lalawigan sa Dominggo, Enero 14, sa Cebu City Sports Center (CCSC).
Pipila sa mga senador gihatagan og panahon sa organizer nga makasulti ug sama sa gipaabot, nagbatbat sa ilang nahimo. Igo na seguro nga gi-acknowledge ang ilang presensiya atol sa pakigpulong ni Cebu Gov. Gwendolyn Garcia.
Kinsay naghatag og higayon nga makasulti sila sa entablado? Dili kini basta-basta, busa klaro nga dunay pagtugot sa gobernador. Imbes positibo ang presensiya sa mga politiko, nahimo’ng tinubdan sa yawyaw sa ubang nanan-aw.
Tuyo sa mga tawo sa pagtambong sa kalihukan mao ang pagtan-aw sa mga presentasyon, dili mamati sa pakigpulong sa mga politiko. Klaro nga nigamit sa higayon sa ilang pulitikanhong interes. Nagkaduol na ang mid-term elections sa sunod tuig.
Ug ning sayo, sila namugas-pugas sa pagkuha og botos pinaagi sa pagtambong dagkong mga kalihukan sa nasod sama sa Sinulog. Karong Dominggo, Enero 21, ang kahulugan sa kapistahan ni Sr. Sto. Niño de Cebu ug Sinulog grand parade ingon man showdown sa South Road Properties (SRP).
Segurado nga dunay motambong na usab nga nasudnong mga politiko ug opisyal. Hinaut nga igo lang sila’ng mosaksi ug di mohatag og pakigpulong nga makalangay sa programa ug dili mahimong ngil-ad ang ilang presensya.
Hinaut usab nga si Mayor Michael Rama dili motugot nga duhigan sa bulok sa pulitika ang Sinulog sa SRP. Bisan kini kulturanhong kalihukan nagpalambo sa turismo, apan atong huna-hunaon nga kalihukan kini nga halad sa Sr. Sto. Niño.
Ang imahen sa Senyor simbolo sa pag-abot sa Kristiyanismo sa nasod dala sa mga kolonyalistang Espanyol niadtong 1521. Kini ang naghimo sa Sugbo nga sabakan sa pagtuo nga Kristiyano sa Asya.