Editoryal: Mga saad nga gipakyas

Editoryal: Managana kanunay sa online
EDITORYAL

Sukad si Acting Mayor Raymond Alvin Garcia miasumer sa iyang kapasidad karon human gisuspenso si Mayor Michael Rama, daghan siya og gipangsusi ug nadiskobre. Usa niini ang pagtrabaho sa Cebu City Medical Center (CCMC), diin iyang nakita nga wa na gitrabaho sa kontraktor ang third floor sa tambalanan. Wa natiwas ang pagtrabaho nga unta kuwangan na lang og 20 porsiyento aron mahuman.

Bisan tuod nimando si Garcia sa kontraktor sa pagtiwas sa trabaho, gusto niyang susihon kon nganong wa kini nahuman aron masuta kon kinsa ang nakaingon, ang Siyudad ba o ang kontraktor mismo.

Sakto kaayo ni nga lakang nga iyang gihimo kay gikinahanglan nga maklaro kinsa ang nasayop, di kay diretso nga mobasol nga way pagsusi. Di makiangayon sa bisan asa nga habig busa kinahanglan nga susihon.

Daghan na kaayo ang mga saad sa paghuman sa CCMC, sukad pa niadtong 2020. Ang katapusan nga saad nga humanon niadtong Pebrero ning tuiga ug sa pagtapos sa tuig.

Karon nadiskobrehan ni Garcia nga bisan ang third floor sa ospital wa pa nahuman. Kay naa na man nang pito ka andana, mas maayo tingali nga mao na ang kompletuhon og una sa di pa tiwason ang ikawalo ngadto sa ika-10 nga andana. O kon madungan kay naay igo nga kwarta, mas labing maayo.

Gusto sa acting mayor nga mapaspasan ang pagtrabaho sa tambalanan samtang naa pa siya sa iyang kapasidad karon. Nagtinguha siya nga mabuweluhan ang pagtrabaho hinungdan nga naninguha siya nga ang P650 milyunes nga wa pa magasto alang sa pagtukod sa tambalanan gamiton aron pagtiwas sa pagtrabaho sa edipisyo nga hapit na mag 10 ka tuig sukad gisugdan ang pagtukod.

Dinhi sab makita ang kapabilidad ni Garcia sa pag manage sa mga proyekto ug kalihukan sa Siyudad.

Una, sa iyang pag-asumer nakigsulti dayon siya sa mga buhatan nga gikasungi ni Rama sa wa pa siya suspensuha. Gisusi usab niya ang mga imprastraktura nga proyekto, sama sa sentro sa panglawas sa Brgy. Apas nga ubos sa pakigtambayong sa Dept. of Health (DOH) ug extension nga ospital sa Brgy. Guba nga wa na nakairog ang trabaho duha ka mga tuig na ang nakalabay.

Kini nga mga lakang maayo nga mga direksyon kay sa sige og pangaway nga way lain nga paingnan, kapildehan sa katawhan kay di na man makatutok sa mga serbisyo nga gikinahanglan unta kaayo. Sama sa pagtiwas sa CCMC nga daghan nang mga saad nga gipakyas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph