Maayo ang kalamboan samtang nagkaduol na ang Sinulog Festival 2024 nga ipahigayon sa ikaduhang higayon sa South Road Properties (SRP) sa dakbayan sa Sugbo karong Enero 21, Dominggo.
Maisip nga milagro ni Sr. Sto. Niño nga dunay nahimong maaghop ang balatian sa duha ka mga lokal nga lider nga kanhi nagpagahiay sa ilang baruganan.
Si Mayor Michael Rama niingon nga pinal na nga SRP gihapon ang venue sa Sinulog grand parade ug showdown ning tuiga.
Apan nitugot siya sa Sinulog sa Kabataan sa Lalawigan nga ipahigayon sa Cebu City Sports Center (CCSC) karong Enero 14.
Si Cebu Gov. Gwendolyn Garcia nipahibawo hinuon nga ang mga mayor nakahukom nga di sila mo-perform sa SRP tungod sa hulga sa panahon tungod sa kahimtang sa mao nga dapit.
Dugang pa, si Garcia mohatag og pinansiyal nga ayuda sa Dakbayan alang sa Sinulog.
Sa pagkakaron, bisan medyo apiki na sa panahon, apan gidoble ang pagtrabaho sa venue sa Sinulog sa SRP ug giandam usab ang CCSC alang sa Sinulog sa Lalawigan.
Ang Sinulog Festival ug ubang kulturanhong kalihukan sa dakbayan lahi sa relihiyusong tulumanon apan importante kining bahin sa pagpaalegre sa kapistahan.
Nagdasig usab sa grasya gikan sa Batang Balaan sa Sugbo nga nagpatuyok sa ekonomiya sa dakbayan nga resulta sa turismo.
Mapasalamaton kita sa balaang espiritu nga nagpatunga sa mga lokal nga lider nga magkasabot alang sa pagpahigayon sa mga kalihukan sa kapistahan.
Apan ang importante ug dili nato malimtan nga mga magtutuo mao ang relihiyusong tulumanon.
Takos ang pagpasalamat sa Kahitas-an nga nakalabang kita sa laing tuig human sa daghang hagit ug mga pagsuway sa atong kalig-on ug pagpakabuhi.
Ug hinaut nga malampuson ug malinawon ang tanang mga kalihukan sa umaabot nga kapistahan sa dakbayan sa Sugbo.
Pit Senyor!