Editoryal: Modern PUV, karaang utok sa driver

EDITORYAL
EDITORYAL

Aron mangawala na ang daan nga mga PUJ, gipatuman sa Dept. of Transportation (DOTr) ang modernisasyon sa mao nga matang sa pampublikong transportasyon nga kadaghanan gubaon, tayaon ug magtulo na ang tubig kon mag-uwan.

Busa gipangporma ang mga kooperatiba aron mopalit og mga bag-ong PUV nga sa tinud-anay, sama kadako sa mini-buses. Minos na lang ang karaan nga mga PUJ nga nagdagan human gilugwayan ang pagpadagan kanila.

Apan ang nagmaneho sa moderno nga mga PUV mao ra sab ang mga drayber sa karaan nga mga PUJ. Nag-ilis og mga sakyanan apan mao lang gihapon ang mga drayber, uban kanila mga abusado gihapon kaayo.

Mga duha ka semana ang nakalabay, usa ka bata nga pasahero ang naangol tungod sa pataka og padagan sa usa sa mga driver sa PUV nga iya sa Latransco. Nireklamo ang mga ginikanan ngadto sa Land Transportation Office (LTO) ug Land Transportation Franchising and Regulatory Board (LTFRB) hinungdan nga gipaatubang ang driver ug ang coop officials.

Di lang ni mao, duna say mga pasahero sa laing PUV sa laing coop nangreklamo sa miaging semana kay gipakanaug ang mga pasahero taliwa sa flyover sa Mambaling kay dunay nanakop sa nag overloading. Laliman ka taliwa sa flyover nanglakaw ang mga pasahero nga gipadali sa pagpakanaug?

Pipila ka mga semana ang nakalabay, nangreklamo sab ang pipila ka pasahero sa PUV sa laing coop kay di magtarong pagpanukli ang konduktor. Magdoble pa sa pagpaningil sa pasahero nga mao pay gihimo’ng bakakon.

Gikinahanglan nga usbon sa manage­ment sa mga kooperatiba ang menta­lidad sa ilang mga driver pinaagi sa kanunay nga pag seminar ug pagpahinumdom nga mag-usab na sila sa ilang dautan nga taras kaniadto. Biyaan na nila kini.

Kay moderno na man ang ilang gimaneho nga mga sakyanan, biyaan usab nila ang ilang karaan nga mentalidad. Sa laktod, usbon ang panghuna-huna ngadto sa maayo.

Gubot pa sa lukot ang atoang mga karsada tungod sa naghuot nga mga sakyanan sa kadalanan, dugangan pa ning nagpabadlong nga mga driver. Mosamot kagubot ug kakuyaw ang kadalanan.

Mag-unsa man gud ang modernisasyon sa publikong tranportasyon kon magpabilin ang kinaraan nga mentalidad sa mapasagaron ug abusado nga mga dri­ver? Kon dunay kausaban sa sakyanan, nuntan usab unta sa kausaban sa mga nagmaneho niini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph