Ang suliran sa trapiko wa nay kasulbaran kon padayon nga magkadako ang ekonomiya sa nasod, apil na ang Sugbo kay mouban man pagsulbong ang pagdaghan sa mga sakyanan. Sa mga Asian, status symbol ang mga sakyanan.
Apan nahibawo ka ba nga bisan sa dagko nga mga karsada sa Beijing, labing dako nga metropolitan area sa China, naghuot gihapon ang mga sakyanan? Di diay ang pagpadako sa mga karsada ang solusyon sa trapiko, kon di ang pagpaminos sa mga sakyanan, labina sa pribado.
Sa Guangzhou, ikatulo nga metropolitan area sa China, duna silay dapit nga car-less. Mao ni ang gihimo nila nga susama og Time Square sa New York. Biseklita ra ang gitugtan sa pagsulod apan sagad imong makita mao ang pedestrians.
Naa ang mga sinehan, dagko nga malls ug mga signature boutique. Bisan ang siyudad mismo luag sa trapiko tungod kay maayo ang ilang public transport ug daghan sa mga sakyanan nga electric na.
Gihatagan og prayoridad ang mga electric bike, instead, ang motorsiklo maoy ilang gi-ban sukad sa 2007 tungod sa nagkadaghan nga mga aksidente.
Dinhi sa Metro Cebu, labina sa tri-cities, gagmay ang mga karsada ug wa nay igong dapit alang sa expansion kay nanurok na ang dagko nga mga edipisyo.
Apan makapasubo nga way kongkretong plano ang elected officials sa pagsulbad sa suliran. Kada adlaw, kada buwan o kada tuig, nagkadaghan ang mga sakyanan sa kadalanan.
Kon maghuwat pa ang mga local government unit (LGU) sa nasudnong kagamhanan, hayan maabtan pa og usa ka century ang problema. Nga unta sa gahom sa mga mayor, sa usa ka hiniusa nga lakang, masulbad kaayo nila ang problema sa lokalidad.
Determinasyon ug political will, pagpasabot sa publiko ug konsultasyon ang gikinahanglan alang sa pag-umol og mga plano sa pagpaminos sa pribado nga mga sakyanan sa kadalanan.
Kon way himuon nga radical nga lakang ang kagamhanan, moabot ang adlaw nga ang trapiko mohunong na tungod sa kadaghan sa mga sakyanan sa kadalanan.