Gilambigit ni retired colonel ug kanhi manager sa Philippine Charity Sweepstakes Office (PCSO), Royina Garma, sila si kanhi Presidente Rodrigo Duterte ug incumbent Senator Christopher “Bong” Go sa mga anti-drug operation sa tibuok nasod nga nisangko sa pagpatay.
Giluwatan kini ni Garma atubangan sa Quad Committee sa miaging adlaw pinaagi sa iyang gibasa nga pinanumpaang affidavit. Iyang gitumbok ang iyang upper classman sa Philippine National Police Academy (PNPA) nga si Police Col. Edilberto Leonardo nga nangulo.
Si Leonardo ang iyang giingon nga maoy iyang girekomendar ngadto kang Duterte human giingon nga nimando kaniya ang kanhi Presidente sa pagporma og national anti-drug task force nga magkopya sa “Davao Model” nga naghatag og ganti sa mga polis nga makapatay. Iyang gidetalye ang kalambigitan nila ni Duterte ug Go sa mga operasyon batok sa illegal drugs.
Nisaad si Garma nga mohatag pa siya og dugang mga detalye ngadto sa mga magbabalaud sa usa ka executive session base sa iyang direktang mga nahibaw-an.
Sa pikas bahin, namasangil si Kerwin Espinosa, kinsa niangkon kaniadto nga usa siya ka drug lord, nga gisugo siya ni Senador Ronald “Bato” dela Rosa, kanhi pangulo sa PNP, sa paglambigit kang kanhi Senador Leila de Lima sa illegal drugs. Namasangil siya nga gihulga siya ni dela Rosa. Nanghimakak na usab si Kerwin nga usa siya ka drug lord.
Ang iyang amahan nga si kanhi Albuera Mayor Rolando Espinosa Sr. napatay sa mga polis sulod sa bilanggoan. Si Kerwin kandidato pagkamayor sa Albuera sa 2025 elections, apan namahayag atubangan sa quadcom nga andam siyang moatras sa iyang kandidatura aron makab-ot ang hustisya sa kamatayon sa iyang amahan.
Sa dagan karon sa imbestigasyon, tulo ka dagkong mga opisyal ang gianam-anam og lansang sa committee hearings: kanhi Presidente Duterte, Senators Go ug dela Rosa nga hangtod karon mga kaalyado pa sa kanhi administrasyon.
Sa dagan karon sa imbestigasyon, duna kaha kini sangkuan, sama sa pagpasaka og kaso batok sa mga opisyal nga gilambigit sa extra judicial killings (EJK). Makakuha kaha kini og igong mga ebidensya nga makabarog sa pagkutikuti sa korte?
Di kaha kini mahisama sa nangagi nga mga imbestigasyon sa mga magbabalaud nga nahilis ug na-dismiss kay huyang diay ang mga ebidensya human namakwi ang mga saksi? Hinaot pang di kini mahulog nga demolition job.