Pagkadaghan na man lang ang maapektuhan kon mahimong pinal ug mapatuman na kining kamanduan sa Land Transportation Franchising and Regulatory Board (LTFRB) nga ipahunong ang operasyon sa Move It sa mga dakbayan sa Sugbo ug Cagayan de Oro.
Lakip sa mga maapektuhan mao ang mga estudyante ug trabahante nga magdali nga makaabot sa ilang paingnan apan gustong makadaginot sa plite kumpara kon mosakay og taxi. Hinuon, aduna pa’y laing kompanya nga nagdumala og motorcycle taxi sama sa Angkas, Joy Ride, ug Maxim.
Apan ang labing apektado niini mao ang kapin sa 6,000 ka riders nga puwedeng mawad-an og panginabuhian. Tingali, angayang hunahunaon og maayo sa kadagkuan sa LTFRB kining ilang kamanduan.
Sa usa ka suwat nga pirmado ni LTFRB Chairman Teofilo E. Guadiz III, giingon nga wala’y permiso gikan sa Technical Working Group (TWG) ang Move It sa pag-operate sa maong mga lugar.
Apan gipasabot sa general manager sa Move It nga si Wayne Jacinto nga ang ilang operasyon nakabase sa giisyu sa LTFRB nga motorcycle taxi guidelines nga nagtugot nga moserbisyo sila sa duha ka mga dakbayan. Ambot nasayop lang ang interpretasyon sa kadagkuan sa Move It sa lagda sa LTFRB kabahin sa motorcyle taxi.
Nagkinahanglan lang tingali nga adunay mas klaro nga komunikasyon ug koordinasyon ang duha ka mga kampo aron masulbad kini nga kakulian.
Kon adunay kasingkasing ang LTFRB sa riders, nga nagtarong pagpangita og panginabuhian, nagsakripisyo ug nangandoy alang sa kaugmaon, dili nila angayang ipahunong ang operasyon sa Move It sa duha ka mga dakbayan.
Dili angayang mahimong biktima ang riders ning haw-ang o kalibog kabahin sa administratibo ug legal nga mga proseso aron magpadayon ang operasyon sa Move It sa gitumbok nga mga dakbayan.
Hinuon, giklaro man sa LTFRB nga ang ilang kamanduan dili pa pinal gumikan kay adunay motion for reconsideration.
Una mobuhi og pinal nga desisyon ang LTFRB kabahin ning maong isyu, angayan niining tun-an og insakto ang mga dokumento, klaruhon ang mga lagda ug seguraduhon nga ang ilang desisyon makiangayon ug adunay tawhanong kaluoy alang sa riders.