Sa panahon ni kanhi Presidente Rodrigo Duterte makakugang ang mga inquiry sa Senado ug Ubos Balay Balauranan kalabot sa giingon nga kalambigitan sa public officials sa illegal drug operations.
Usa sa mga biktima sa tumotumo nga mga akusasyon ug gani napasaka ang kaso mao si kanhi senador Leila de Lima nga nisangko sa iyang pagkabilanggo samtang nagpadayon ang hearing sa kaso.
Samtang nagkaduol ang pagkapupos sa termino ni Duterte, nag-anam og kabasura ang mga kaso sa korte batok kang de Lima human namakwi ang mga saksi sa ilang pinanumpaang mga pamahayag. Kadto diay, matod sa mga saksi, mga tumotumo lang diay kay dunay gisaad kanila bugti sa ilang pagsaksi.
Karon sa panahon na ni Presidente Ferdinand Marcos, ning pag-aslom sa relasyon nila sa mga Duterte, nia na say duha ka kombiktado nga mga binilanggo. Sila namasangil kang Duterte nga maoy nagsugo sa pagpatay sa tulo ka mga inmate sa Davao Prison and Penal Farm sa Davao del Norte.
Managsama ra ni nga pattern niadtong panahon ni Duterte nga mga inmate ang sagad gipanggamit nga mga saksi, apil na ang giingon nga self-confessed drug lord sa Leyte.
Karon nga di na ilang panahon, sila na sab ang naigo sa pasangil sa mga tawo nga sama sa mga karakter kaniadto, kombiktado sab nga mga kriminal. Way mawala kanila kon unsa man ang ilang pamahayag.
Sa pagbasura sa mga kaso batok kang de Lima, nakita sa korte nga huyang kini tungod sa pagbakwi sa mga saksi nga nipasangil nga sila gipugos sa pagtumotumo batok sa mga opisyal nga gipasanginlan. Bisan gani ang giingon nga drug lord nakalingkawas sa kaso.
Apan kini nga mga hitabo karon sa paggamit sa mga saksi nga ang karakter kadudahan wa lang mahitabo sa duha ka nagsunod nga mga administrasyon, kaniadto naa sab ni, gawas lang sa panahon ni anhing Presidente Benigno Aquino III.
Kinsa pa man kaha ang motuo sa mga pamahayag sa mga saksi? Sayon ra baya kaayo ang paghimo og mga pasangil, labina sa mga inquiry sa mga magbabalaod, apan ang pagmatuod niini sa korte lain.
Makabarog ba kaha kini sa pag-utingkay sa hukmanan aron mamatud-an nga 100 porsyento, di lang kay 99 porsyento lang. Di ba kaha mahisama sab ni sa nangaging mga inquiry nga nahanaw ug natunaw kay lain na sab ang nanghawod sa MalacaƱang?
Kon kaniadto makugang ang katawhan sa pasangil, karon ingon na gani sa naanad na ang publiko.