Editoryal: Nag-ung-ong nga krisis sa bakuna

Editoryal: Nagwang-wang?
EDITORYAL

Nabalaka ang Cebu City Health Dept. ug Dept. of Veterinary Medicine and Fisheries tungod sa kakuwang sa mga bakona batok sa tetanus ug rabies. Ang problema kay ang budget karong tuiga naa lang sa P60 milyunes, mas ubos sa 2023 nga P100 milyunes.

Hayan maalibyuhan ni pinaagi sa pagpalabang og supplemental budget aron dunay ikapalit nga bakona nga gikinahanglan kaayo sa publiko. Kay matod sa duha ka mga barangay kapitan sa Cebu City, di lang kay kuwang, panagsa ra mangabot ang mga bakona.

Sa ato pa, way klaro ang pag-abot sa mga bakuna sa ilang mga barangay health center. Sagad sa mga bakona sa health centers mao lang ang tetanus kay ang anti-rabies vaccine sagad naa man sa buhatan sa CCHD.

Gikinahanglan kaayo ang bakona batok sa rabies taliwa sa pagsaka sa mga kaso nga hapit na nanobra sa gidaghanon sa mga kaso sa 2023 bisan mosulod pa ang Hulyo kun duna pay unom ka mga bulan nga nahabilin ning tuiga.

Mas kuyaw ug nahimo nang komplikado ang problema busa gikinahanglan kini nga tagdon og dali sa mga opisyal sa Dakbayan sa Sugbo samtang duna pay igo nga panahon.

Unsa kahay rason nga inay umentuhan, gikibhangan man hinuon ang budget sa mga bakona ug tambal? Kini tipik sa batakang serbisyo sa Siyudad nga kon di man gani dugangan, kinahanglan nga di tibhangan agi og panagana sa wa paabuta nga mga hitabo, sama karon sa mga kaso sa rabies sa siyudad.

Bisan pa kon maingon tang wa mahurot ang budget sa nangagi nga duha ka mga tuig alang ni nga mga katuyoan, di gihapon kini katarungan nga tibhangan. Kon di ipabilin, pun-an isip panagana.

Labina gyud karon nga nahuman na ang ting-init, misulod na sab ang ting-uwan. Panahon sa ting-uwan, mosaka ang nagkadaiyang mga sakit nga nagkinahanglan og tambal. Wa ra bay laing madangpan ang kinabag-an sa mga kabos, anha sila sa mga health center diin sila dali nga makadagan kay maglisod sa pagpalit og tambal.

Hinaot pa nga hatagan dayon og pagtagad kining nitumaw karon nga problema sa mga bakona, apil na niini ang mga tambal. Naka-focus ra ba ang mga opisyal karon sa pangandam sa Palarong Pambansa, Cebu Bus Rapid Transit ug Cebu City Medical Center (CCMC).

Maorag nalubong kini nga isyo sa pagpaminos sa gahin sa mga tambal ug bakona. Basin ba mahigmata na lang ang Siyudad nga duna diay krisis sa panglawas nga mapugngan unta kon nabantayan.

Karon nga nitumaw kini, hinaot nga dalion kini pagtagad.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph