Kon atong sabton, ang gisalikway nga tanyag ni Presidente Ferdinand “Bongbong” Marcos Jr. alang sa panaghiusa human sa giingong pagduda ni Former President Rodrigo Roa Duterte (FPRRD), usa ka indikasyon sa giladmon sa nasinati nga krisis sa politika sa nasod ingon man sa personal nga relasyon tali sa duha ka pamilya nga pulos mga impluwensiyado.
Ang kawalay pagsalig ni FPRRD sa tanyag ni Marcos Jr. alang sa panaghiusa dili lamang usa ka personal nga pamahayag, apan usa ka simbolo sa kasinatian sa panagbangi, ug kasakit tali sa duha ka nagbangi nga lider. Bisan pa sa paningkamot ni Marcos pinaagi sa iyang podcast nga nipadayag nga bukas siya sa panag-uli, ang gidudahan nga posibleng pamolitika lamang ug walay tinguha sa tinuoray nga pagtinabangay ug panaghiusa maoy rason di motuo ang kampo ni Duterte.
Dugang pa, ang hulga nga ipadayon nga impeachment proceedings batok ni Bise Presidente Sara Duterte naghatag og kabalaka ug nahulga ang kalinaw ug kalig-on sa nasudnong administrasyon. Giingon nga "unstoppable" si Sara Duterte nagpakita sa usa ka matang sa determinasyon nga mahimong makapausab sa dagan sa politika sa Pilipinas, bisan pa sa pagkabilanggo sa iyang amahan.
Apan sa tunga sa tensyon, makapadasig nga madungog nga si FPRRD nagpabiling lig-on ug malipayong didto sa The Hague ug mapasalamaton sa kainit nga gipakita sa iyang mga suporter. Kini nagpasabot nga sa luyo sa tanang kontrobersiya, ang katawhan ang nagapadayon sa paghupot sa ilang baruganan ug pagtuo sa ilang gipili nga lider.
Ang pangutana karon mao: Makab-ot pa ba kaha ang panaghiusa? Sa usa ka demokratikong nasud, ang panag-uli ug tinud-anay nga kolaborasyon tali sa mga lider importante aron makab-ot ang kalamboan.
Apan kon ang interes sa gahom ug personal nga panagbangi magpabilin nga babag, ang katawhan gihapon ang mag-antos.
Ang mga lider angay nga magtan-aw sa mas lapad nga kaayohan sa nasod, dili lang ang ilang kaugalingong interest.
Gipanghinaot nga dili pa unta uwahi ang tanan, mahimo pa nilang pilion ang dalan sa panaghiusa ug pagtinabangay.