Editoryal: Nagwang-wang?

Editoryal: Nagwang-wang?
EDITORYAL

Ang ambulansiya usa sa mga sakyanan nga gitugotan sa Land Transportation Office (LTO) nga mogamit og wangwang o siren sa pagtubag sa alarma o emerhensiya, pagkuha og pasyente ug paghatod niini ngadto sa tambalanan.

Gawas niini, ang ambulansiya gidid-an usab sa pag­wang­wang kon padulong na mopauli sa ilang base.

Apan ang pag-abuso sa prebilihiyo sa paggamit og wang-wang maugkat lang kon dunay mahitabo sama sa pagkabalintuwad sa usa ka ambulansiya sa national highway sa Sityo Cancainap, Brgy. Tulic, lungsod sa Argao, ala 1:20 sa hapon, Huwebes, Hunyo 13, 2024.

Usa ka rescuer ang namatay ug laing tulo ang nangaangol nga naglakip sa usa ka nurse gikan naghatod og pasyente sa Vicente Sotto Memorial Medical Center (VSMMC) ug nagbiyahe pauli sa ilang dapit sa siyudad sa Dipolog, Zamboanga del Norte.

Ang ambulansiya gipanag-iya sa Provincial Disaster Risk Reduction Management Office (PDRRMO) Zamboanga del Norte.

Dalaygon ang ilang trabaho nga nagluwas sa kinabuhi apan masulub-on usab nga naapiki ang ilang kinabuhi tungod sa paglapas sa lagda o kaha mugna pagdali sa pagpauli sa ka layo sa Dipolog sa Mindanao ug mosakay pa sila og ro-ro sa nautical highway.

Sumala sa pipila ka mga saksi nga kusog kaayo ang dagan sa ambulansiya ug nag-wangwang pa bisan human sila naghatod og pas­yente sa dakbayan sa Sugbo.

Ang disgrasya dili tuod matagna apan pwede minusan ang impact kon magtamod sa insakto nga pagmaneho lakip sa saktong pagsusi sa kondisyon sa sakyanan, labi na kon mobiyahe og layo, labaw na sa usa ka ambulansiya.

Matod pa, nibuto ang ligid sa driver’s side ug sa kakusog sa ilang dagan, grabe ang impact human katulo kini nabalintuwad.

Dili unang higayon ang aksidente nga naglambigit og ambulansiya ug ang pag-abuso sa pribilihiyo sa paggamit sa wang-wang.

Busa dugang edukasyon pa alang sa defensive driving ug uban pa sa pagseguro sa kaluwasan sa pagmaneho’g ambulansiya aron dili madisgrasya.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph