Ang katukoran sa The Stria sa Lungsod sa Santa Fe, Isla sa Bantayan usa ka hulagway sa kahuyang sa pagpatuman sa balaod ug ang kabalaka sa masayon-sayon na lang ang atong mga balaod sa ngalan sa kuwarta ug impluwensya.
Ang Environmental Compliance Certificate (ECC) ug building permit klaro nga nagtugot ra og tulo ka andana, apan nakapabarog og 11 ka andana. Kini dili lang sayop—usa sab ka klaro nga nisupak sa balaod.
Ang pagsang-at og kompleto nga papeles dili pasabot nga limpyo ang proyekto kon ang tinuod nga konstruksyon sobra sa gihatag nga permiso. Nimando si Cebu Governor Pamela Baricuatro nga ipasusi ang nakontrobersiyal nga edipisyo nga gitukod sa baybayon sa Santa Fe, isla sa Bantayan ug iyang gihulagway nga “out of place.”
Samtang giingon nga wala’y restriction sa gitas-on sa estraktura nga maoy depensa sa local government unit sa Santa Fe, daw malimbungan ang katawhan sa teknikalidad bisan pa man nga klaro ang balaod ug limitasyon sa gipahamtang sa Department of Environment and Natural Resources (DENR).
Gipanid-an sa publiko kon aduna ba gyuy kaisog ang Kapitolyo ug mga hingtungdan ahensiya sa kagamhanan nga mabadlong o mapakgang ang maong proyekto o ang kabalaka nga lupigon sa gahom sa mga negosyante nga ang isla mahimong personal nga business playground.
Ang Bantayan dili angay ipailawom sa mga proyekto nga makaguba sa talan-awon ug nahulga ang kinaiyahan.
Kon ang balaod dili ipatuman bisan sa klaro kaayo nga paglapas, unsa pa man ang katuyuan sa ECC, permit, ug height restriction?
Maniid ang Sugboanon kon unsay mahitabo sa umaabot mapadayon ang maong konstruksiyon o ipahunong base sa nakitang ka-lapasan? Atong atngan…