Editoryal: Nahitabo sa Palaro indikasyon sa 2025 elections

Editoryal: Nahitabo sa Palaro indikasyon sa 2025 elections
EDITORYAL

Nabantayan ang wa pagtambong ni Bise Presidente Sara Duterte sa pagbukas sa Palarong Pambansa niadtong Martes sa hapon. Wa usab si suspended Mayor Michael Rama. Politika dayon ang niabot sa huna-huna sa kadaghanan.

Ang Cebu City wa unta naka host sa Palaro karong tuiga kon wa pa nihimo og lakang sa pag-host si Rama busa angay usab unta siya nga nitambong bisan man lang usa sa mga spectator agi og pag-ila ug pagtahod kaniya. Tingali dunay makaingon nga bati, apan bisan sa pagpakita man lang sa makadiyot, maayo na unta.

Apan masabot usab ang wa pagtunga ni Rama tungod kay gawas nga niaslom ang relasyon nila ni Acting Mayor Raymon Alvin Garcia, base sa mga pamahayag sa suspended mayor sa batan-ong Garcia, diha usab si Gobernador Gwendolyn Garcia nga iyang gikasungi labot sa Cebu Bus Rapid Transit (CBRT) kay portion sa proyekto gipahunong sa gobernador.

Lisod na tingali mahilot pa ang kasungian sa duha ka dagkong mga opisyal sa Sugbo. Hayan kuli na nga magkauli pa ang maayo nga kabubut-on sa acting mayor ug suspended mayor kon basehan ang mga pamahayag ni Rama sa pagdumala ni Garcia sa City Hall.

Mao usab ang Bise Presidente nga gipaabot unta nga nitunga tungod kay ang Dept. of Education (DepEd) ang nangulo ning nasudnong torneyo sa paugnat sa kusog. Wa pa niepekto ang iyang resignation isip kalihim sa Deped.

Apan base sa dagan sa mga balita nga nanggawas, klaro nga wa na sa maayong relasyon ang administrasyong Marcos ug mga Duterte, apil na kang Bise Presidente Duterte. Kadto lang pagpahibawo ni Duterte nga wa na ang unity team sa Davao kay nahuman na ang eleksyon timailhan na.

Kadto mao nay timailhan sa pagbadlis sa politika tali sa mga Duterte ug mga Marcos. Busa, mapaabot ang panag-atbang sa ilang mga kaalyado sa 2025 midterm elections, apil na dinhi sa Sugbo. Ang nahitabo sa Palaro opening salvo maoy indikasyon sa mahitabo sa umaabot nga piniliay. Mag-iyahay na og posisyon alang sa eleksyon.

Kini hinuon nga mga hitabo sa politika karon gipaabot na nga mosangko sa ingon niini ang dagan. Sa Dakbayan sa Sugbo, ang relasyon tali ni Rama ug Garcia daan nang komplikado tungod sa ilang kaubanan sa partido.

Ang panag-alyansa usab sa mga Marcos ug Duterte di na maayo og daan og pundasyon. Ang way lipodlipod nga pagsaway ni kanhi Presidente Rodrigo Duterte kang Marcos mismo atol sa 2023 elections usa na ka dili maayo nga tilimad-on.

Busa, ang nahitabo sa Palarong Pambansa maoy giya sa pagbasa sa politika sa 2025 elections.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph