Sukad pa sa miaging tuig nga naglalis kinsa ang angay matuman sa pagpadagan sa Metropolitan Cebu Water District (MCWD), ang board ba nga gipangulohan ni chairman Joey Daluz o ang board nga gilangkuban sa mga tinudlo ni Cebu City Mayor Michael Rama.
Sama sa usa ka relasyon, nahimo nga komplikado ang sitwasyon kay duna may third party nga nisulod sa eksena. Nitudlo og laing kasamtangan nga board ang Local Water Utilities Administration (LWUA) nga mosusi sa mga dokumento ug uban pang aspeto sa pagpadagan sa water utility sulod sa unom ka mga buwan.
Ang MCWD board nga gipangulohan ni Daluz niingon nga sila gihapon ang lehitimo samtang si Rama niingon nga ang iyang mga tinudlo ang angay nga molingkod.
Apan niingon ang LWUA board nga maoy kasamtangan nga mopadagan, way gipulihan bisan asa sa duha, kay temporaryo lang sila samtang nagsusi sa kahimtang sa panalapi sa water utility.
Ang LWUA usa diay ka buhatan sa kagamhanan nga tigpahuwam o tigpautang sa mga water district sa nasod.
Samtang sila naglalis, nideklarar na si Rama og water crisis tungod sa epekto sa El Niño. Sa wa pa siya nideklarar og water crisis, nideklarar ang Konseho og state of calamity sa 28 ka mountain barangays sa siyudad nga apektado sa huwaw.
Ang nakapait pa, kay ang gipatawag ni Rama sa usa ka tigom sa habig sa MCWD mao ang iyang mga tinudlo nga way bisan usa kanila nga giila sa water firm. Unsaon nila pagrepresentar sa habig sa water firm?
Di lang ra ba kini nga away ang giatubang ni Rama, naa say kasungian sa Cebu Port Authority (CPA), kansang proyekto sa pantalan ilang gikural. Di pa na mao, naa pay lalis kabahin sa pagpasar sa ordinansa sa Siyudad kalabot sa real property tax (RPT).
Maingon tang puno intawon ang mga kamot sa mayor, gikan sa away labot sa MCWD, krisis sa tubig, problema sa Compania Maritima ngadto sa RPT. Naa pa diay Cebu Bus Rapid Transit (CBRT) system. Kabug-at sa mga problema sa mayor nga kinahanglang tutokan. Di na tingali kabakasyon ang mayor.