Editoryal: Nganong gipamugos?

Editoryal: Nganong gipamugos?

Nangalipay na unta ang mga motorista sa pagsira sa gigama nga U-turn slot sa Cebu South Coastal Road (CSCR) kay nakuhaan na ang kakuyaw sa mga mangagi gikan sa mga sakyanan nga kalit lang mangliko ug manggawas. Unta gud, toa may u-turn slot ilawom sa taytayan nga mga 500 metros gikan sa mao nga portion.

Gireklamo kini sa daghang mga motorista kay duol ra kaayo ni sa taytayan nga sa ilawom nahimutang ang karsada nga adto moliko. Maayo unta og layo pa kaayo, masabot ang lakang sa Siyudad. Apan duol ra kaayo, nganong gipamugos man kini?

Daan nang nihinay ang dagan sa trapiko sa mga eskina sa mall sa South Road Properties (SRP) unya mahunong na sab ang dagan sa mga sakyanan.

Masabot ang mga traffic light ug pag U-turn sa mga sakyanan sa habig sa dakbayan sa Talisay kay nahimutangan kini sa naandan nang mga karsada sa siyudad. Nahimutang kini sa residential areas. Sa pagdesinyo sa CSCR, gikonsiderar kini nga mga dapit. Nasayod na sab ang mga motorista niini.

Apan tan-awa ang kanang U-turn slot nga gibutangan og traffic lights sa Cebu City, wa kini mahaum sa iyang desinyo sa mao nga expressway. Kon ang mga eskina sa CSCR sa Talisay usa sa mga dapit nga diin dunay taas nga mga aksidente, unsa na kaha ang kanang habig sa Cebu City?

Lahi sa dakbayan sa Talisay nga dunay liboan nga namuyo sa mga dapit nga nahimutangan sa mga eskina nga dunay traffic light, ang sa habig sa Cebu City maihap lang ang mga residente. Gawas pa lagi nga duol kaayo ang nahimutangan sa U-turn slot nga naa ilawom sa taytayan.

Ngano kaha nga gipamugos man kana sa Siyudad taliwa sa balido kaayo nga mulo sa mga motorista nga tig-agian sa dapit?

Daan nang grabe ang trapiko ug kuyaw ang CSCR, alang sa daghan nga netizens, nipasamot kini kakuyaw sa mao nga expressway. Unsa gyud kaha ang nagpaluyo ning mao nga desisyon nga negatibo kaayo alang sa publiko?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph