Editoryal: Nganong ipamugos ni Rama?

Editoryal: Nganong ipamugos ni Rama?
File photo

Nahilom na man unta ang isyo kabahin sa suway nga pagpa takeover ni Cebu City Mayor Michael Rama sa iyang mga tinudlo ngadto sa Board of Directors (BOD) sa Metropolitan Cebu Water District (MCWD), apan sa kalit lang, nibuto og balik human nitudlo na sab ang mayor og tulo ka mga sakop.

Nitudlo na lang ang mayor kay wa sila tubaga sa Local Water Utilities Administration (LWUA) kalabot sa gahom ni Rama sa pagtaktak ug pagtudlo og mga sakop sa BOD, matod sa iyang kampo.

Si BOD chairman Joey Daluz niingon nga magpabilin sila sa ilang lingkuranan kay ilegal ang gibuhat sa mayor. Nabalaka usab siya nga maapektuhan ang mga kontrata nga ilang gipirmahan tali sa mga kompaniya nga mo-supply og dugang tubig sa service area sa water district.

Unsa may basehanan sa mayor nga iya man gyud nga ipamugos ang paghulip kanilang Daluz? Si Daluz niingon nga pulitika ug ang iyang pagsupak sa pag manage sa kompaniya sa mga Villar sa water district ang katarungan sa mayor.

Maglisod si Rama sa paghatag og lig-on nga katarungan kay sa tanan nga nangagi nga BOD, sila lang si Daluz ug kaubanan ang nangita og mga pamaagi aron molambo ang water supply sa MCWD. Sa una gud, pirme sila nga maproblema sa kakuwang sa agas sa tubig sa daghang mga dapit, labina sa mga barangay nga naa sa kabukiran.

Sa ilang paghatag na, naproblema na sab sila. Tungod sa kakusog sa agas sa tubig, nangbuto ang daghan nilang mga tubo tungod sa kadaan na niini ug kakusog sa water pressure.

Anam-anam na usab nga nadugangan ang supply sa tubig sa isla sa Mactan nga nag-antos usab sa dugay nang panahon sa kakuwang sa tubig.

Karon, taliwa ning tanan, nganong ipamugos man ni Rama ang paghulip sa mga sakop sa BOD? Wa siya nakabantay nga lahi niadtong panahon ni anhing mayor Edgardo Labella, ang ubang mga mayor nisuporta sa pagpalagpot sa mga BOD.

Apan karon ning iyang tinguha, si Rama nag-inusara. Wa siya nakahuna-huna kon ngano nga nag-inusara lang siya niini nga katuyoan?

Hayan nakakita ang mga mayor sa ubang mga local government sa Metro Cebu sa paninguha nila ni Daluz ug kaubanan nga madugangan ang supply sa tubig ug dunay madangpan ang katawhan kon moigo ang huwaw, sama sa gipaabot nga “strong El Niño.”

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph