Sa Traffic Index Report sa TomTom, ang Metro Manila naa sa ika 18 sa labing grabe og problema sa trapiko sa 404 ka mga siyudad sa kalibutan. Apan kataw-anan kay ang Siyudad sa Sugbo nanguha og ideya sa Metro Manila Devt. Authority (MMDA) unsaon sa pagbadbad ang suliran sa trapiko, labina sa Banilad-Talamban road.
Bisan gud weekend, Sabado ug Dominggo, ang karsada nga nailhan sab nga Bantal, grabe og suliran sa trapiko. Di mabangbang ang kadaghan sa mga sakyanan, labina karong Disyembre nga dunay daghang mga party.
Unsa may ikatabang sa MMDA sa suliran sa trapiko nga sila gani mismo wa nakasulbad sa problema sa ilang tugkaran? Hagbay ra ning problema sa trapiko sa Metro Manila, sukad pa niadtong late 80’s hangtod karon. Nanaghan na lang ang mga flyover, naa gihapon ang ilang suliran.
Mas maayo pang magkuha og klaro nga consultant sa suliran sa trapiko kay sa nag-tap sa MMDA. Gawas pa, naa bay maayong laki nga makasulbad sa suliran sa nagbaha nga mga sakyanan sa kadalanan? Kada tuig nadugangan ang gidaghanon sa mga sakyanan, pun-an pa sa mga nagdagan nga hayan wa ma-renew o wa mismo narehistro, di na roadworthy.
Bisan ang pipila ka mga urban center sa China, nga nakasinati og problema sa trapiko, sama sa Beijing, nihimo og radical nga lakang. Ilang giundang ang pagrehistro sa bag-o nga mga sakyanan.
Ila ning gibuhat kay bisan sa kalapad sa ilang mga karsada, di gihapon hapit makalihok ang mga sakyanan sa kadalanan. Ilang naamguhan nga nanglapad man tuod ang kadalanan, apan di ni paigo sa pagdaghan sa mga sakyanan.
Di ba kaha maayo nga dunay moratorium sa pagpangrehistro sa bag-o nga mga sakyanan? O kontrolahon ang gidaghanon niini matag buwan? Estriktuhon sab, bisan sa visual inspection, ang padaganon sa karsada, labina niadtong kanunay na maguba sa kadalanan.
Ning grabe nga suliran karon, gikinahanglan ang radical nga lakang sa nagkagrabe nang suliran sa trapiko.