Kon madayon kining tinguha ni Bacayan Barangay Captain Winston Pepito nga “City Hall at your Fingertips” nga konsepto, dali na lang unya ang pag-transact sa city hall gamit ang internet ug ang mga tawo dili na moadto didto.
Si Pepito nidaug pagkakonsehal sa Dakbayan sa Sugbo sa bag-ohay lang nahuman nga eleksyon niadtong Mayo 12, 2025.
Atol sa usa ka news forum niadtong Martes, Mayo 27, 2025, niingon si Pepito nga nagplano siya nga iduso ang “City Hall at your Fingertips” nga pamaagi sa pag-transact sa city hall sa higayon nga hingpit na siyang molingkod isip konsehal.
Gipasabot ni Pepito nga kini nga konsepto malampuson nang gipatuman sa Barangay Bacayan.
Pinaagi sa usa ka mobile application, ang mga residente sa Bacayan maka-access sa mga serbisyo sama sa pagkuha og cedula ug barangay clearance nga naglakip og delivery sa mga gipangayo nga dokumento.
Matod niya nga kini nga pamaagi magtugot sa publiko sa paghimo og transaksiyon sa city hall nga dili na kinahanglan mo-absent sa trabaho.
Apan si Niza Archival, laing umaabot nga konsehal sa Cebu City, mipadayag og kabalaka sa plano ni Pepito, sanglit dili tanan, ilabi na niadtong nagpuyo sa kabukiran, adunay access sa mga gadget.
Agi og tubag, si Pepito niingon nga iya unyang i-propose ang pagpalambo sa network signals sa kabukiran.
Matod niya nga ang manpower dili mahimong hagit niining teknolohikal nga pagbalhin.
“Ang tanan ra natong buhaton mao ang pagbansay kanila og gamay bahin sa paggamit sa sistema. Dili sila kinahanglan nga makakat-on og coding o unsa pa,” siya nidugang.
Bisan pa man niini, si Archival nipadayag og kaandam nga motabang ni Pepito sa modernisasyon sa mga serbisyo sa City Hall.
Matod niya nga mamahimo nga dili sayon alang sa daghang tawo ang pisikal nga pag-adto sa City Hall.
Si Pepito kinsa nanag-iya og gamay nga Business Process Outsourcing (BPO) nga kompanya sulod sa 25 ka tuig, niingon nga ang iyang kasinatian sa industriya sa BPO mahimo niyang magamit sa online transaction applications.
Gisuportahan sab ni Pepito ang konsepto ni umaabot Bise Mayor Tomas Osmeña nga “Mayor of the Night,” nga mohatag og serbisyo sa katawhan 24/7.