SI Cebu Archbishop Jose Palma sa iyang homily iyang gipahaom sa nagkaduol na nga paglingkod sa mga nidaog nga opisyal sa Hunyo 30, 2025, nga ang mandato sa katawhan tingog sa Ginuo, iyang gisangpit dili lamang ang espirituwal nga aspeto sa liderato, apan ang moral nga obligasyon.
Sa atong sistema sa demokrasya, ang pagdaog sa piniliay dili lang kalampusan sa politika; kini usa ka sagrado nga pagtugyan sa pagsilbi nga maghulagway sa kamatuoran nga ang gahum nga gihatag sa katawhan kinahanglan gamiton alang sa ilang kaayohan, dili alang sa personal nga interes.
Apan ang pangutana: andam ba ang atong mga napiling opisyal sa tinuod nga obligasyon sa pag-alagad? Sa kasinatian sa katawhan, daghan na ang nakasinati og mga saad nga walay natuman, mga plataporma nga gibilin sa kampanya, ug mga lider nga klaro nga ang ilang kaugalingong katuyoan human nga sila nakalingkod sa katungdanan.
Ang panawagan ni Archbishop Palma — nga magpabilin ang katuyoan nga moalagad sa publiko ug ang pagkamatinud-anon sa saad.
Ang iyang pahimangno nga ang tingog sa katawhan mao sab ang tingog sa Ginuo, nagpasabot nga matag desisyon nga ilang buhaton adunay espirituwal ug moral nga kabilinggan dili lamang legal o teknikal.
Apan dili ra kini limitado sa lokal nga pamahalaan. Gitumbok sab ni Archbishop Palma ang mas lapad nga panan-aw — ang papel sa Pilipinas sa kalibutan nga puno sa panagbangi.
Ang panawagan ni Papa Francisco nga hunongon ang giyera tali sa Israel ug Iran, gipasabot ni Palma nga adunay epekto bisan pa sa mga nasod nga anaa sa layo, ang ekonomiya, presyo sa lana, uban pa apektado.
Ang espirituwal nga giya nga gihisgutan ni Palma dili lamang simbahan ang gipunting — apan ang konsensya, ang integridad, ug ang panlantaw nga ang gahum sa publiko, kon gamiton sa hustisya ug pagmahal sa katawhan, makahatag og tinuod nga kabag-ohan.
Busa, ang panawagan karon sa tanan nga molingkod nga opisyal: ayaw ninyo sayangi ang higayon. Ayaw ninyo pakyasa ang salig sa katawhan. Pamatud-i nga ang inyong pagdaog dili lang resulta sa politika, apan ikaw ang gisaligan sa katawhan.