Editoryal: Oras sa Sinulog angay bang usbon?

Editoryal
Editoryal

Dunay plano ang mga opisyal nga nagdumala sa mga kalihukan sa Sinulog nga sugdan kini sa alas 3 sa hapon. Naandan na sa nangaging mga Sinulog nga buntag pa lang magsugod na ang street dancing.

Ang pag-usab sa oras nagagumikan sa pagbalhin sa naandan nga agianan nga mga karsada sa Cebu City ngadto na sa Cebu South Coastal Road (CSCR) sa South Road Properties (SRP). Lahi sa kinapusoran sa siyudad nga dunay mga building ug kahoy nga kapasilungan, ang CSCR hawan kaayo. Way mga kahoy ug building nga kapasalipdan.

Kon husto ang bana-bana sa mga weather expert nga magsugod na og kakusog ang El Niño sa Enero, init ang panahon sa Sinulog 2024.

Supak si Konsehal Jocelyn Pesquera sa plano tungod kay alang kaniya makaapekto kini sa turismo tungod kay naandan na ang tibuok adlaw nga sayaw sa kadalanan nga mahuman sa wa pay alas 10 sa gabii. Gibasehan sa plano mao ang Pasigarbo sa Sugbo nga hapon na gisugdan apan nahuman og alas 12 sa tungang gabii. Apan matod ni Pesquera nga di kini makaayo sa kabataan nga mo-perform kay maabtan og tungang gabii. Sa pag-uli pa lang, hayan mabuntagan na.

Dunay maayo nga mga punto ang duha ka mga habig. Panglawas ug turismo ang kang Pesquera samtang sa pikas panglawas ug kaminos sa kahasol sa kainit ang ilang punto. Apan gikinahanglan ba nga sa SRP ipahigayon ang Sinulog 2024?

Kon sa CSCR, mahimo man nga palapdan o dugangan ang covered bleachers ug butangan og shades alang sa dancers. Hasol ug gasto, apan kon makapalambo kini sa gidaghanon sa mga turista, makatampo sa mga negusyo sa dapit, worth it pud ang magasto. Hayan makatabang ang dagkong mga negusyo sa SRP sa mga galastuhan kay mabulahan man sab sila.

Niini, dunay kapasilungan o makasalipod sa mga manan-aw ug dancers gikan sa tumang kainit. Makuhaan ang kalbaryo sa kainit.

Ning dagan sa mga huna-huna karon, klaro nga wa pa mahan-ay ang Sinulog 2024. Yuna pa, gisugdan na ba og trabaho ang venue?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph