Ang bag-o nga pahibalo gikan sa Land Transportation Franchising and Regulatory Board (LTFRB) nga ikonsiderar ang P1 nga usbaw sa pletehan alang sa pampublikong transportasyon sa sunod semana gisugat lang og pagsaway sa mismong mga tawo nga unta tabangan niini: ang mga drayber sa traditional jeepney sa Sugbo.
Samtang gipresentar sa LTFRB kini isip tubag sa pagsaka sa presyo sa lana sa kalibutan tungod sa panagbangi sa Iran ug Israel, ang Pagkakaisa ng mga Samahan ng Tsuper at Opereytor (Piston) Cebu Chapter nibaliwala niini tungod kay dugay na kaayo nga gisang-at ang petisyon alang sa dugang pletehan sa mga pampublikong mga sakyanan apan wala kini tagda kaniadto.
Dali ra makita kon ngano. Si Greg Perez, presidente sa Piston Cebu Chapter, tin-aw nga niingon sa SunStar Cebu nga ang ilang petisyon alang sa pagtaas sa pletehan dugay na nga gisang-at apan gibalewala lang.
Tungod sa padayon nga pagsaka sa presyo sa gasolina, ang P1 nga usbaw, sumala ni Perez, “dili gyud paigo.”
Ang pasalig sa administrasyon ni Marcos sa paghatag og subsidy sa gasolina alang sa sektor sa pampublikong transportasyon, bisan og maayo paminawon, gibati sab nga usa lang ka temporaryo nga kahupayan.
Bisan pa sa gamay nga usbaw, gipadayag ni Perez nga dili sila makapangayo og mas dako nga usbaw tungod sa palas-anon nga epekto niini sa ilang mga pasahero, labi na sa mga estudyante kansang mga pamilya naglisod na sa pinansyal.
Ang solusyon, ingon sa maalamong gisugyot ni Perez, wala sa ginagmay nga pag-adjust sa pletehan o temporaryo nga subsidy, apan sa usa ka mas sukaranan nga pagbag-o sa polisiya: ang pagtangtang sa excise tax sa gasolina ug diesel.
Dili kini bag-ong hangyo, gipalanog na kini sa mga grupo sa transportasyon sa milabay nga mga katuigan.
Ang pagwagtang niini nga buhis maghatag og direkta, mahinungdanon, ug malungtarong kahupayan sa mga drayber sa jeepney ug sa mga sumasakay.
Kini tinuod nga makapagaan sa palas-anon nga magtugot sa mga drayber nga makakuha og mas patas nga panginabuhian nga dili makaapekto sa mga pasahero.
Hangtod nga ang gobiyerno seryusong motan-aw niining mga nagpahiping isyu ug mopatuman og mas epektibo, dugay nga solusyon sama sa reporma sa buhis sa gasolina, kining P1 nga usbaw sa pletehan alang sa naglisod nga mga drayber sa jeepney sa Sugbo, gamay ra kaayo.