Giaprobahan na sa Kongreso sa ikatulo ug katapusang pagbasa ang gisugyot nga umento nga P200 sa inadlaw nga suholan sa mga trabahante sa pribadong sektor nga nagsweldo og minimum.
Ang maong lakang nakakuha og 171 ka boto gikan sa mga representante nga uyon, usa ka boto nga dili uyon ug walay abstention atol sa plenary session niadtong Miyerkules, Hunyo 4, 2025.
Matod ni Trade Union Congress of the Philippines (TUCP) party-list Representative Raymond Democrito Mendoza nga mao kini ang labing unang gipatuman nga pagtaas sa suholan sulod sa 36 ka tuig sukad niadtong 1989.
Siya niingon nga ang maong lakang makabenepisyo sa kapin lima ka milyon nga minimum wage earners ug sa ilang mga pamilya ug makahaw-as kanila gikan sa kalisud. Posible pa gani nga maapsan sa mga minimum wage workers ang suweldo sa mga above minimum nga trabahante. Bisan pa man, dako kaayo ni nga tabang taliwala sa atong gisagubang nga taas nga bayranan sa kuryente ug sa tubig matag buwan, taas nga presyo sa mga palaliton ingon man pletehan.
Sa akong nahinumdoman, ang minimum nga pletehan sa public utility jeepney sa Dakbayan sa Sugbo kaniadto kay P8 ra apan karon naabot na og P13, samtang sa tricycle nga P7, nahimo nang P15.
Hinaut nga hangpon sa mga kompanya ang maong kalambuan, dili kay palabihon nila ilang ginansiya kaysa sa ikaayo sa ilang mga empleyado. Daghang mga empleyado karon, hilabina kadtong aduna nay pamilya, nga naputos og utang tungod kay gamay ra ilang sweldo. Lugos na gani makapalit og bag-ong senina, sapatos, brief ug uban pa kay unahon ang bugas, sud-an aron dili mapasmo ang pamilya.
Gawas pa, aduna pa gyuy mga anak nga nag-eskwela nga mangayo og allowance.
Mao usab ni ang rason nga daghan gihapog pobre diri sa Pilipinas ug ang nadato ang mga nagpahulam ra og kuwarta.
Kasagaran sa minimum wage workers mapugos og pangutang sanglit ang ilang suweldo nga madawat kulang pa sa inadlaw-adlaw nga panginahanglanon sa ilang pamilya. Ang mahitabo mosamot og kapusoy kay ang suweldo gikuhaan na man daan para ibayad sa utang.
Mas maayo tingali nga ato lang gyung likayan ang pagpangutang og ato lang inat-inaton atong suweldo nga makaabot pa sa sunod nga suweldo, aron way maningil nato ug hapsay ang panghunahuna.