Ilusad na sa kagamhanan sa Probinsiya sa Sugbo ang dungan nga pagpamaligya sa P20/kilo nga bugas sa tibuok probinsiya nga manukad sa Provincial Capitol grounds karon’g adlawa, Mayo 1, 2025.
Gipahibawo ni Gov. Gwen Garcia atol sa iyang pagpakigtagbo sa mga mayor sa probinsiya sa Kapitolyo niadtong Abril 25, 2025, nga mahimo nang makuha ang bugas gikan sa kagamhanang probinsiyal sugod sa Lunes, Abril 28, 2025.
Ang P20/kilo rice kabahin sa programa sa Department of Agriculture ubos sa direktiba ni Presidente Ferdinand Marcos Jr.
Niadtong Lunes usab, ang Lungsod sa Daanbantayan nagsugod na sa pagpamaligya sa NFA rice ngadto sa ilang mga konstituwente samtang ang Lungsod sa Santander nisunod sa Martes, Abril 29.
Ang gihatagan og prayoridad sa Daanbantayan mao kadtong persons with disabilities, solo parents ug senior citizens.
Ang ilang mga benepisyaryo mahimo’ng makapalit og 10 ka kilo nga bugas kada semana. Kinahanglan ra sila nga mopresentar og QR-coded card alang sa pag-verify sa ilang pangalan.
Ang 10 ka kilo nga bugas humay mobalor ra tanan og P200. Dako na kini nga savings kon itandi sa ubang bugas nga mapalit sa tindahan sa tag P50 kapin ang kilo. Hinaut nga maayo ni nga klase sa bugas ug dili kadtong mga old stock og gipangbukbok na.
Sa Santander, ang pagpamaligya sa barato nga bugas gipaagi sa kada barangay aron ang mga tawo hilabina kadtong nagpuyo sa bukirang bahin, dili na molugsong pa.
Kini’ng maong pamaagi makabenepisyo sa mga taga bukid, sanglit dili na sila mokuot sa ilang bulsa para i-plete sa habalhabal.
Kay kon mokuot pa sila, tabla ra sila’g nipalit og mahalon nga bugas, dili gihapon sila makadaginot.
Ang ilang hatagan og prayoridad kadtong nauna og abot (first come, first served), matod sa Municipal Agriculture Office (MAO) sa maong lungsod base sa ilang social media post.
Ang ilang distribution schedule sa kada barangay molanat ra og tulo ka oras -- alas 8:30 hangtod alas 11:30 ang sa buntag, ug ala 1:30 hangtod alas 4:30 ang sa hapon.
Sa Dakbayan sa Sugbo, si Mayor Raymond Alvin Garcia niingon nga maghuwat pa siya sa detalye gikan sa national government mahitungod sa pagpamaligya sa barato nga bugas sa dili pa ipatuman ang programa.
Matod niya nga sa higayon nga maisyu na ang guidelines, mopagawas sab siya og executive order mahitungod sa pagdumala sa programa aron hapsay ang pagpatuman niini.