Gipahibalo sa bag-ong gitudlo nga hepe sa Philippine National Police (PNP) nga si General Nicolas Torre III nga ang kadaghan sa mga nadakpan nga nalambigit sa ilegal nga drugas mahimong usa sa mga sukdanan sa performance sa kapulisan.
Ang maong pamahayag iyang giluwatan niadtong Hunyo 2, 2025, atol sa pag-instalar ni President Ferdinand Marcos Jr., kaniya sa maong posisyon.
Sa uban nga panan-aw, usa kini ka agresibo ug klarong baruganan.
Apan isip usa ka kritikal nga magtan-aw, kinahanglan nato tan-awon og lawom ang epekto ug posible nga risgo niini alang sa malungtaron nga sistema sa hustisya ug sa katungod sa tawo.
Samtang giklaro sab ni Torre nga gikinahanglan nga buhi ang mga suspetsado o ang dinakpan ug tahuron ang human rights.
Ang paglikay sa extrajudicial killings usa ka positibong lakang usa ka matang sa pagpanalipod sa tawhanong katungod.
Apan kon himuon nga “paramihan og aresto” nga maoy ipahamtang sa kapulisan, posible nga moresulta kini sa posible nga bulilyaso sa pagpasaka og kaso batok sa dinakpan.
Taas ang posibilidad nga huyang ang kaso nga ipasaka, pagpangdakop nga walay klaro ug kuwang og lig-ong ebidensiya, ug labaw sa tanan ang kakuwang sa due process kay adunay qouta nga giapas.
Sayod ta nga ang numero o gidaghanon mahimong mapahimuslan. Kon ang usa ka police station makadakop og 50 ka suspek sa usa ka semana, masubay ba sa publiko kon kadtong mga kaso nasang-at ba sa korte? Legal ba ang proseso sa pagdakop? O gikumpromiso lang ang standard alang lang sa “performance rating”?
Gawas pa, daghan sa atong barangay officials kuwang pa sa kahibalo sa legal procedures. Ang pag-intensify og koordinasyon kon walay klarong guidelines mahimong modugang lang og tensiyon ug kahadlok sa komunidad kay basin mas daghan ang madakpan tungod lang sa duda o pulitika sa lokal nga level.
Dili sukdanan ang kadaghan sa mga nadakpan. Ang tinuod nga sukdanan mao ang kadaugan sa kaso sa korte, ang pagkasakmit sa druga, ug ang pagseguro nga mapanalipdan ang kinabuhi ug katungod sa tanang nalambigit.
Laing pangutana sa kadtong buhatan sa polis nga dili daghan ang nangadakpan nga drug related suspect, unsay mahitabo?
Sa laing bahin, ang baruganan ni Torre nga walay public shaming sa sayop nga police officers usa sab ka welcome nga lakang.
Apan kinahanglan kini suportahan sa transparent nga proseso sa internal discipline aron mosalig ang katawhan nga ang kapulisan seryuso sa pagpanubag sa ilang mga miyembro.
Sa katapusan, dili sayop ang pagdakop sa mga kriminal apan sayop kon himuon kini nga daw sama sa pa-contest.
Dili ikalimod nga sa Pilipinas adunay kasaysayan sa pag-abuso sa gahum, angay nato nga bantayan kon ang usa ka maayong tinguha mahimong gamiton sa sayop nga paagi.