Editoryal: Pag-abi-abi sa mga magduduwa

EDITORYAL
EDITORYAL

Mainitong paghangop sa gatusan ka mga magduduwa gikan sa nagkalainlaing dapit sa rehiyon 7 alang sa Central Visayas Regional Athletic Association (CVIRAA) meet sa dakbayan sa Sugbo nga moabli karon, Sabado, Mayo 4, ug motapos sa Huwebes, Mayo 9, 2024.

Apan lahi niadto nga pagpahigayon sa CVRIAA dinhi sa dakbayan, dili kita makasaksi sa mga duwa sa paugnat-sa-kusog sa usa ka dapit human katag kaayo ang venues kay wala pa mahuman ang pag-ayo sa Cebu City Sports Center (CCSC).

Sa pagkakaton, ang swimming pool area sa CCSC maoy bugtong magamit kay hingpit na kining nahuman sa pag-ayo nga nigasto og P25 miyunes gikan sa pribadong donasyon o pundo.

Busa mamili na lang kita sa duwa nga hilig nimo nga tan-awon tungod sa panaglagyo sa venues, pananglitan sa Sacred Heart School-Ateneo de Cebu, ubang tunghaan sa dakbayan ug lakip sa Dakbayan sa Naga. Nasayran nga ang way outdoor games sa CVRIAA nga ipahigayon sulod sa alas 9:00 sa buntag ngadto sa alas 3:00 sa hapon aron paglikay sa direktang pakabuwad sa kainit ning summer ug El Niño phenomenon.

Ang nag-unang konsiderasyon sa mga opisyal mao ang panglawas ug kaluwasan sa mga magduduwa hinungdan nga gilikay sa mga oras nga naglagiting ang kainit samtang kapin usab sa 200 ka mga polis ug force mulipliers sa Cebu City Police Office (CCPO) ang gipangdestino sa mga venue sa duwa.

Ug hinaot mahuman na sa hingpit ang pag-ayo sa CCSC sa dli pa ang Palarong Pambansa 2004 nga ipahigayon usab dinhi sa dakbayan karong Hulyo ning tuiga diin modagsa ang mas daghang magduduwa ug mga dumuduong gikan sa nagkalainlaing dapit sa nasod.

Isip mga molupyo sa host nga dakbayan sa dakong kalihokan sa paugnat-sa-kusog, suportahan nato kini bisan sa yano nga gawi sa pagkamahigalaon sa mga bisita aron mouli sila sa ilang tagsa-tagsa ka dapit bawon ang alegre ug maayong kasinatian.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph