Editoryal: Pag-abuso sa drugas ‘misulbong’

EDITORYAL
EDITORYAL

Nakamatikod ka ba nga nisulbong og balik ang negosyo sa ilegal nga drugas? Nahisama o labaw pa niadtong wala pay pandemiya sa Covid-19.

Maghilak na ang adlaw kon way nahitabo nga buy-bust sa kapulisan. Dili lang ginagmay, daghang dinagko o minilyon ka pesos na.

Sa Biyernes sa kaadlawon, Disyembre 8, kapin sa usa ka kilo nga shabu nga mobalor og dul-an sa P7 milyunes ang nasakmit gikan sa duha ka mga babaye sa Sitio Cadasig, Barangay Tisa, dakbayan sa Sugbo.

Niadtong Huwebes sa buntag, Disyembre 7, usa ka kanhi konsehal sa Brgy. Sto. Niño, siyudad sa Sugbo nasikop sa buy-bust sa kapulisan sa Bayanihan Village, Barangay Quiot. Nakuhaan siya og lima ka dagkong mga putos sa shabu nga nitimbang og 20 gramos nga mobalor og P136,000.

Samtang, ang Police Regional Office (PRO 7) nitaho nga sa ilang subsob ug dungan nga mga operasyon sa rehiyon sukad sa Enero 1 hangtod sa Nobiyembre 26, 2023, dul-an sa P1 bilyon ang balor sa drugas nga nasakmit.

Kini ug uban pang ginagmay nga mga kaso nga nagbansiwag kanunay sa mga taho sa traditional ug social media. Resulta kini sa gihingusgan nga kampanya sa mga awtoridad batok sa ilegal nga drugas busa daghang nasakmit ug nasikop.

Matod pa, magkakusog usab ang negosyo sa drugas sa panahon sa holiday season gikan sa Disyembre ngadto sa Sinulog sa Enero.

Bisan unsay hinungdan sa pagsaka sa gidaghanon sa nasakmit nga drugas ug nangasikop, ang kamatuoran nga mibalik ang pagdaghan sa mga parokyano niini.

Unsay hinungdan? Tungod ba kaha sa krisis o problema? Dayag kini nga timailhan nga dunay kakuwang sa edukasyon labina sa iyang epekto sa panglawas. Ang hamubo nga kahupay ug kalipay bugti sa mas malahutayong pag-antos o kamatayon.

Pinaagi sa edukasyon, mas lugdang ang pagsabot sa paglikay sa pag-abuso. Ug kon wa nay parokyano, ang negosyo sa ilegal nga drugas mawala usab sa iyang natural nga pagkamatay.

Kaakuhan nato nga mabuot nga lungsoranon ang pagpakaylap sa edukasyon batok sa pag-abuso sa drugas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph