NIPASIUGDA si Cebu City Mayor Raymond Alvin Garcia og libreng concert, "The Sinulog is Back," nga nag-feature sa sikat nga mga mang-aawit nga sila si TJ Monterde, JK Labajo, ug KZ Tandingan sa Cebu City Sports Center (CCSC) kagabii, Huwebes, Enero 16, 2025.
Gihamok kini sa pag-abuso sa scalpers o mga tawo nga nagkuha og libreng ticket ug ila kining gibaligya ngadto sa mga tawi nga gusto motan-aw apan wa nakakuha of ticket.
Ang ticket gipang-apudapod sa pagkontrolar sa mga tawo nga makasud aron dili manubra sa kapasidad sa CCSC. Naunsa man nuon nga duna may scalpers.
Duha ang posibilidad sa ticket nga gibaligya. Una, mahimong tinuod kini nga nakuha sa mga nilinya atol sa pagpanghatag nga libre nga ticket. Ikaduha, mahimo'ng peke o hinimo lang.
Matod pa, walay tino nga balaod batok sa scalping. Gani, ang ubang local government units (LGUs) nagbase sa namugna nga ordinansa alang sa pagsikop ug pagpahamtang og multa.
Duna ba kahay ordinansa sa Dakbayan sa Sugbo batok sa scalping?
Dili makiangayon nga ibaligya ang libre nga ticket. Gawas pa, dili kuwarta gikan sa panudlanan sa dakbayan apan gikan sa personal nga bulsa ni Mayor Garcia.
Apan wala magsaba niini ang mayor niadtong una ug naaghat sa pagbutyag dihang usa sa mga komentaryo sa social media nagkanayon nga kuwarta gikan sa panudlanan ang gigasto sa konsiyerto.
Samtang ning pagbalik sa kaalegre sa palibot human sa kapin sa duha ka tuig nga pandemiya sa coronavirus disease (Covid-19) diin ang tanan nahisama sa "piniriso" sa kaugalingong dapit o pinuy-anan.
Subo nga pamalandungon nga uban sa pagbangon sa ekonomiya human sa pandemiya, nabanhaw usab ang mga malapason sama sa scalpers ug uban pa nga kinahanglang masumpo ang pag-abuso.
Masaligon kita ni Mayor Garcia nga nimando sa pag-imbestigar sa scalping ug pagsikop sa scalpers aron mataral sa hukmanan aron mahatagan og leksiyon sa ilang kasaypanan ug ehemplo sa uban nga di mohimo sa samang buhat.