Ang dalan dili dulaan, ug ang motorsiklo, bisan pa man sa kagamit niini sa paglikay sa trapiko, mahimong lungon kon dili magmatngon.
Sulod lamang sa 24 oras—niadtong Mayo 6 hangtod Mayo 7, 2026,—tulo ka kinabuhi ang nakalas sa managlahing disgrasya sa Sugbo. Kini usa ka masulub-on nga pahinumdom nga sa usa ka pamilok, ang biyahe mahimong trahedya.
Ang nahitabo sa South Hills, Barangay Tisa diin namatay ang usa ka 47-anyos nga drayber, nagtudlo kanato sa kamahinungdanon sa maintenance.
Matod sa angkas nga naangol, nawad-an og brake ang motor samtang naglugsong.
Isip mga tag-iya og sakyanan, obligasyon nato nga sigurohon nga anaa sa maayong kondisyon ang atong preno, ligid, ug suga sa dili pa kita mobiyahe. Ang “mechanical failure” sagad malikayan kon duna lay saktong pag-atiman.
Apan sa pikas bahin, ang trahedya sa San Fernando nagpakita sa mas pait nga kamatuoran: bisan unsaon nimo og amping, mahimo ka gihapong maamong sa sayop sa uban.
Ang kamatayon sa duha ka batan-on, ang 16 ug 18 anyos, tungod sa usa ka Hi-Ace van nga pataka og overtake ug ni-counterflow maoy hinungdan.
Bisan nag-helmet ang mga biktima, wala kini makasalbar kanila tungod sa kakusog sa impact gikan sa nagpataka og padagan nga drayber sa van.
Nanawagan kita sa tanang naggamit sa dalan nga dili mokumpyansa sa kondisyon sa sakyanan, magbaton og disiplina sa pagpadagan, ug kanunay’ng mag-amping pinaagi sa defensive driving aron malikayan ang mga disgrasya.
Giawhag sab ang mga drayber sa pag-inspeksyon sa ilang mga sakyanan matag higayon nga sila mobiyahe.
Kinahanglan ang saktong pagmentinar sa sakyanan aron maseguro ang kaluwasan sa tanan diha sa karsada.
Dili ikabaylo sa bisan unsang kantidad o katarungan ang kinabuhi nga makalas tungod lang sa pagpabaya.
Sa atong paggawas sa balay, huna-hunaon nato ang pamilyang nagpaabot kanato. Mag-amping intawon ta, kay sa karsada, walay “undo” button kon duna nay mamatay.
Ang tinuod nga kaisog sa drayber wala sa kapaspas sa dagan, kondili sa abilidad niini nga makapauli sa iyang kaugalingon ug sa iyang isig-katawo nga luwas ug buhi.
Apan labaw sa tanan, kanunay kitang mag-ampo ug mangayo og panalipod sa Labawng Makagagahom batok sa bisan unsang disgrasya.