Ang pagtapos sa usa ka administrasyon ug ang pagsugod sa usa ka bag-ong liderato usa ka matang sa demokratikong pagpadayon sa lokal nga panggamhanan. Ang ceremonial turnover, bisan pa man nagsilbi kining simbolo nga kalihukan, apan usa sab kini ka importante nga aspeto sa malinawon nga pagtunol sa gahum.
Apan sa kahimtang karon sa Kapitolyo sa Sugbo, walay partisipasyon si kanhi Gobernador Gwendolyn Garcia sa seremonyal nga turnover ngadto sa bag-ong Gobernador Pamela Baricuatro.
Ang matod pa kakuwang sa transisyon nga gihisgutan ni Gov. Pam nagpakita sa usa ka posibilidad nga wala’y pormal nga koordinasyon tali sa duha ka administrasyon. Kon atong tan-awon kini gikan sa panan-aw sa maayong pamalaod, ang transisyon dili lang usa ka yano nga bulohaton, kon dili usa ka obligasyon.
Ang maayo nga transisyon nagpasabot adunay pagsinabtanay sa datos, kabahin sa budget, mga proyekto nga nagpadayon, ug estado sa human resources—mga butang nga naglangkob sa continuity sa serbisyo publiko.
Ang wala pagpakita ni Garcia, bisan pa man og angayan siyang pasalamatan sa iyang dugay nga serbisyo sa Sugbo, usa ka pamatasan nga nagduda sa integridad sa demokratikong proseso sa paghatag og responsibilidad ngadto sa mosunod. Dili kini isyu nga personal, kon dili institusyonal. Ang mga buhatan sa gobiyerno nagpadayon sa prinsipyo sa “public trust.”
Ang mga lider kinahanglan motimbang sa ilang personal nga pagbati kontra sa obligasyon nilang ipakita ang respeto sa institusyon nga ilang gialagaran sa dugay nga panahon.
Apan, gikinahanglan kita nga magpabiling patas kay wala ta masayod og unsay internal nga hinungdan nga wala mopatim-aw si Garcia atoll sa turnover. Daghang posibilidad nga gituohan sa mga Sugboanon, hayan may labot kini sa iyang prinsipyo, estratehiya’ng politikal, o personal nga pagbati.
Sa laing bahin, ang pahayag ni Baricuatro sa “colorless administration” usa ka positibong sinugdanan. Ang pagdaug sa eleksiyon usa ka mandato gikan sa katawhan, ug ang serbisyo sa mga Sugboanon wala’y gikinahanglan nga politikal nga kolor. Ang iyang determinasyon nga susihon ang performance sa mga job order employees ug pagpangandam sa executive orders nagpakita sa kahimtang sa usa ka lider nga andam mosugod og trabaho bisan pa sa kakulangan sa transition.
Sa pagsugod ni Gobernador Baricuatro sa iyang termino nagpangayo og kooperasyon dili lang sa iyang team, kondili sa tanang Sugboanon.
Ang pag-uswag sa probinsiya dili nagasalig sa karaang pangalan, kondili sa bag-ong pamaagi ug malungtarong panglantaw. Ang Kapitolyo kinahanglan magpadayon nga mahimong tinubdan sa inspirasyon sa maayong pagdumala—dili lugar sa politika nga puno sa personalismo, kondili sa serbisyo nga nagtabang sa katawhan.
Kini nga isyu dili lang bahin kang Gwen o Pamela. Kini bahin sa unsaon nato pagpanalipod ug pagtukod pag-usab sa kultura sa transisyon, respeto sa institusyon, ug pag-una sa katawhan ibabaw sa personal nga pride. Kay sa katapusan, ang tinuod nga kadaugan dili makita sa entablado sa turnover ceremony, kondili sa matag adlaw nga pagpangalagad nga tinuod nga makahatag og kausaban.