Ang pagkasikop ni alyas Zel sa Dakbayan sa Sugbo tungod sa giingong pagpalit og bag-ong nahimugso nga bata nagkinahanglan og hait nga pagtagad sa ngitngit nga kamatuoran sa child trafficking sa atong komunidad.
Si alyas Zel nalutsan og warrant of arrest sa kasong kalapasan sa Section 4 ug 4 (G) sa Republic Act 11862 kun Expanded Anti-Trafficking in Persons Act of 2022.
Ang maong kaso giduso niadtong Mayo 23, 2025, sa Cebu City Prosecutors Office ug gipasaka sa korte human masuta nga adunay lig-on nga ebidensya ang kapulisan batok sa akusado.
Ang pagkasikop sa nalambigit nga indibiduwal nagpahinumdom nga kining mabangis nga krimen nagtukob sa labing huyang kanato ug nagbilin og dili mapapas nga marka sa katilingban.
Ang mga detalye sa kaso makapabugnaw.
Usa ka bag-ong natawo gikan sa Cebu City Medical Center giingong gibaligya sa kantidad nga P100,000, diin ang biological parents matod pa nakadawat lang og P30 mil, samtang ang middleman mibulsa og P57 mil.
Usa kini ka dakong paglapas sa tawhanong katungod ug pagbudhi sa pagkabalaan sa kinabuhi.
Ang labi nga makahasol mao ang pagbutyag nga ang mga biological parents giingong nakabaligya na og mga bata kaniadto.
Ang estorya sa silingan bahin sa inahan nga nigawas sa ospital nga walay dalang bata, inubanan sa pagpanghambog sa anak nga palitan siya og bag-ong cellphone tungod kay nahalin na ilang bag-ong nahimugso nga manghod, maoy nag-udyok sa kapulisan nga mohimog operasyon batok sa akusado.
Ang paspas nga aksiyon sa Department of Social Welfare and Services (DSWS) ug sa Cebu City Police Office (CCPO) sa pag-rescue sa mga menor de edad nga anak sa biological parents ug pagbawi sa gibaligya nga masuso dalaygon.
Gipasiugda niini ang kritikal nga papel sa inter-agency cooperation sa pagpakigbatok sa maong mga krimen nga nagkinahanglan og bug-os nga imbestigasyon aron dili na kini masubli.
Adunay mga pangutana ngano’ng nakahimo ang mga ginikanan pagbaligya sa ilang bag-ong natawo nga anak.
Tungod ba sa ka kabus? Kulang ba sa edukasyon? Dili igo nga access sa mga sistema sa suporta sa katilingban?
Kining maong insidente usa ka panawagan sa pagmata.
Panahon na alang sa usa ka kolektibong paningkamot, naglambigit sa mga ahensiya sa gobiyerno, non-governmental organizations, komunidad, ug mga indibiduwal aron makamugna og usa ka palibot diin ang matag bata luwas, ug hatagan og kahigayonan nga molambo.
Unsa pa kaha sa imong hunahuna ang mahimo sa komunidad aron mapugngan ang susamang insidente sa child trafficking?