Pipila lang ka semana human gipasirad-an sa Business Permit and Licensing Office (BPLO) niadtong Mayo 20, ang BMJ Data Processing Services sa may Barangay Kasambagan, Dakbayan sa Sugbo nga gituohang usa ka scam hub, lain na pud nga scam hub kon Pogo (Philippine Offshore Gaming Operator) sa may Barangay Alang-Alang, Dakbayan sa Mandaue ang gironda niadtong Hulyo 2, 2025, diin siyam ka mga Chinese national ang gidakop sa mga sakop sa Criminal Investigation and Detection Group (CIDG)-Mandaue City Field Unit.
Kining maong panghitabo nagsugyot og mga kabalaka sa publiko: ang pagdaghan sa ilegal nga operasyon nga nagtakuban isip lehitimong negosyo, nangilad sa mga huyang nga indibiduwal, ug naglihok nga walay pagtahod sa balaod.
Ang raid gihimo human nireklamo ang usa ka 23-anyos nga Pinay nga trabahante nga nagkanayon nga gitanggong sila sulod sa balay ug gipugos sa pagpatrabaho bisan supak sa ilang kabubut-on.
Dili lang kini bahin sa ilegal nga sugal o online scams; kini bahin sa human trafficking, usa ka makalilisang nga krimen nga nagkuha sa kagawasan ug dignidad sa mga indibiduwal.
Ang asoy sa mga trabahante nga gitanggong ug gipugos sa pagtrabaho usa kahait nga pahinumdom niining mga tinago nga operasyon.
Ang kamatuoran nga lima ka mga Chinese national ang nisulay paglayat sa bintana sa ikaduhang andana dihang niabot ang kapulisan nga niresulta sa pagkabali sa tiil ug bukton sa usa, nagpasiugda nga naglikay sila sa mga tinugyanan sa balaod nga nagpasabot nga posible’ng dili legal ang ilang operasyon.
Ang pagkompiska sa daghang cellphones, usa ka tablet, ug mga computer set, nga gikatakda nga ipaubos sa forensic examination, importante kaayo alang sa pagdiskobre sa gidak-on sa operasyon niining gituohang scam hub ug pag-ila sa tinuod nga mga responsabli niini.
Dalaygon nga ang mga kaso sa human trafficking giandam na, uban sa dugang nga mga kaso nga posibleng mosunod base sa forensic analysis sa mga nasakmit nga kagamitan.
Apan ang subli-subli nga kinaiya niining mga nadiskubrehan nanginahanglan og mas proaktibo ug koordinado nga paningkamot gikan sa tanang may kalabutan nga ahensiya sa gobiyerno.
Kinahanglan natong pangutan-on ang atong kaugalingon: Giunsa pagkatukod kining gituohang scam hubs sa atong mga komunidad?
Aduna bay mga kal-ang sa atong mga regulasyon nga nagtugot kanila sa pag-operate nga dili mamatikdan?