Niabot na gyud ang atong gikabalak-an ning panahon sa ting-init ug El Niño phenomenon, ang pagnihit sa tubig sa Sugbo. Ang Metropolitan Cebu Water District, nag-unang lokal nga water distribution facility, nitaho nga nikunhod ang ilang supply sa tubig.
Gikutlo sa mga taho si Tommy Gonzalez sa Production Department sa MCWD nga ilang namatikdan nga nagkaubos ang supply sa tubig sukad sa katapusang quarter sa miaging tuig.
Gikan sa 301,00 cubic meters nga ilang makuha matag adlaw, karon 276,000 cubic meters na lang matag adlaw. Nakibhangan og 25,000 cubic meters matag adlaw ang ilang supply nga tubig.
Ang MCWD maoy nag-unang distributor sa tubig sa mga dakbayan sa Sugbo, Mandaue, Lapu-Lapu ug Talisay ug mga lungsod sa Consilacion, Liloan, Compostela ug Cordova.
Ug sumala sa Philippine Atmospheric, Geophysical, and Astronomical Services Administration (Pagasa), ang dry spell niepekto na.
Gihulagway kini sa sunodsunod nga tulo ka buwan nga ubos ang gidaghananon o volume sa uwan. Kon molungtad sa lima ka buwan, gitawag na kini og huwaw o drought.
Dason sa Pagasa, ang huwaw gibana-bana nga mopekto sa Mayo. Mouga na niini ang nag-unang tinubdan sa MCWD nga mao ang surface water o dam ug kasapaan.
Laing tinubdan mao ang underground water pinaagi sa pagsuyop sa bomba nga seguradong maapektuhan usab kini pag-ayo sa huwaw.
Ang desalinated water o gikan sa dagat nga ikatulong tinubdan sa MCWD wala pa usab makabwelo sa operasyon ang mga pribadong supplier.
Hinuon, ang MCWD gikataho nga nangandam og mga akternatibo nga pamaagi ug diskarte nga maangay ang paghatod og tubig sa ilang franchise area sa Metro Cebu.
Makapaabot kita sa mga mosunod nga adlaw nga posibleng dili makasinati og igong buga sa tubig o dili na 24-oras ang agas.
Tungod niini, ang MCWD nipasidaan sa publiko nga doble ang atong pagdaginot ug pag-recycle sa paggamit sa tubig.
Busa magtinabangay kita sa pagdaginot sa usa sa mga nag-unang panginahanglan sa pagkabuhi ning kalibotan - ang tubig.